مقبوضہ کشمیرمیں ایک اور فوجی کیمپ پر حملہ بھارت کا 2 حملہ آور ہلاک کرنے کا دعوی

مقبوضہ کشمیر کے علاقے ہندواڑہ میں بھارتی فوجی کیمپ پر نامعلوم افراد کی جانب سے حملہ کیا گیا تاہم جوابی کارروائی میں 2 حملہ آور مارے گئے۔

بھارتی میڈیا رپورٹس کے مطابق سری نگر کے علاقے ہندواڑہ میں واقع فوجی کیمپ پر مسلح افراد نے حملہ کیا، مسلح افراد نے 30 راشٹریہ رائفلز کے ہیڈ کوارٹر کے قریب فائرنگ کی، ملزمان اور بھارتی افواج کے درمیان کافی دیر تک فائرنگ کا تبادلہ جاری رہا تاہم دونوں حملہ آور مارے گئے۔ دوسری جانب بھارتی فوج نے کیمپ کے ارد گرد سرچ آپریشن شروع کر کے قریبی گاؤں تجاری میں بھی تلاشی کا عمل شروع کر دیا ہے۔


اس خبر کو بھی پڑھیں: پاکستانی ہائی کمشنر نے اڑی حملے کے بھارتی ثبوت بے بنیاد قرار دے دیئے

واضح رہے کہ گزشتہ ماہ بھی مقبوضہ کشمیر کے علاقے اڑی میں بھارتی فوج کے کیمپ پر حملہ کیا گیا تھا جس میں 18 فوجی ہلاک اور متعدد زخمی ہو گئے تھے۔