اپوزیشن نے 30 اکتوبر کے احتجاج میں شمولیت سے انکار کر دیا

تصادم کی صورتحال پیدا ہوئی تو اپوزیشن تحریک انصاف کا ساتھ نہ دینے کی پالیسی اختیار کر سکتی ہے۔ فوٹو: فائل

---

تحریک انصاف کے چیئرمین عمران خان کے انفرادی فیصلوں کے سبب پی ٹی آئی اور دیگر اپوزیشن جماعتوں میں اختلافات پیداہوگئے ہیں۔

پی ٹی آئی کے رویے کے باعث اپوزیشن جماعتوں کے گرینڈ الائنس کی تشکیل کا معاملہ التواکا شکار ہوگیا ہے۔ ملک کی اہم اپوزیشن جماعتوں نے عمران خان کی پالیسیوں کے سبب مستقبل میں تحریک انصاف کومشترکہ حزب اختلاف کے پلیٹ فارم میں شامل نہ کر نے کاعندیہ دے دیاہے۔

اپوزیشن نے پی ٹی آئی کے 30 اکتوبر کو اسلام آباد میں احتجاج کا حصہ بننے سے بھی انکارکردیاہے۔ اپوزیشن کے اہم ذرائع نے بتایا کہ اپوزیشن کے اہم رہنماؤں نے پی ٹی آئی کے چیئرمین عمران خان کی جانب سے پیپلزپارٹی کی قیادت پرسیاسی تنقید کرنے پر سخت ناراضی کا اظہار کیا ہے۔

پیپلز پارٹی کی قیادت سمجھتی ہے کہ عمران خان اورپی ٹی آئی قیادت کی موجودہ سیاسی پالیسیوں کے سبب اپوزیشن کامشترکہ اتحاد اب تک قائم نہیںہوسکاہے۔ اپوزیشن کے اہم رہنما نے پی ٹی آئی کی قیادت کواپوزیشن کے پیغام سے آگاہ کردیاہے کہ 30 اکتوبر کو اسلام آبادبند کرنے کی پالیسی پر نظر ثانی کی جائے۔

اگر پی ٹی آئی کی پالیسی کے سبب کوئی واقعہ یا تصادم کی صورتحال پیدا ہوئی تو اپوزیشن تحریک انصاف کا ساتھ نہ دینے کی پالیسی اختیار کر سکتی ہے۔