اکشے نے سب سے کم وقت میں فلم کی شوٹنگ مکمل کرکے ریکارڈ بنا لیا

فلم کو حقیقی مقامات پر فلمایا گیا ہے جس کی وجہ سے فلم بنانے میں کم وقت لگا ہے،اکشے کمار فوٹو:فائل

---

بالی ووڈ کے خطروں کے کھلاڑی اکشے کمار نے اپنی نئی آنے والی فلم ''جولی ایل ایل بی 2'' کی شوٹنگ 30 روز میں مکمل کرکے سب سے کم وقت میں فلم بنانے کا ریکارڈ اپنے نام کرلیا ہے۔



اکشے کمار سال میں 3 سے زائد فلموں میں کام کرنے کے حوالے سے شہرت رکھتے ہیں یہی وجہ ہے کہ رواں سال بھی ان کی تین فلمیں ریلیز ہوئی ہیں جنہوں نے 100 کروڑ سے زائد کا بزنس کیا ہے جب کہ اکشے کمار کم وقت میں اپنی فلموں کی شوٹنگ مکمل کرنے کے حوالے سے بھی شہرت رکھتے ہیں لیکن اب انہوں نے ایک ماہ میں فلم کی شوٹنگ مکمل کرا کر سب کو حیران کردیا ہے۔



بھارتی میڈیا رپورٹس کے مطابق اکشے کمار نے اپنی نئی آنے والی فلم ''جولی ایل ایل بی 2'' کی شوٹنگ 30 روز میں مکمل کرکے بھارتی فلم نگری میں سب سے کم وقت میں فلم بنانے ریکارڈ اپنے نام کرلیا ہے جب کہ اداکار کا کہنا تھا کہ فلم جولی ایل ایل بی 2 نے کم وقت میں فلمیں بنانے کے میرے تمام ریکارڈ اپنے نام کرلیے ہیں جس میں ہدایتکار سبھاش کپور نے جادوئی کمالات دکھائے ہیں کیوں کہ فلم کو حقیقی مقامات پر فلمایا گیا ہے جس کی وجہ سے فلم بنانے میں کم وقت لگا ہے۔