پاکستان میں یکم نومبر سے نیا ماحول دوست پٹرول فروخت کیا جائے گا

پی ایس اونے رون 92 پٹرول کیلیے ٹینڈر جاری کردیے، 55 ہزار ٹن کی پہلی کھیپ رواںماہ کے آخرمیں کراچی پہنچ جائیگی

Business Reporter October 12, 2016

نیا پٹرول 2 روپے 70 پیسے فی لیٹر تک مہنگا ہوسکتا ہے، ذرائع۔ فوٹو: فائل

ATLANTA, GA, USA: پاکستان میں یکم نومبر سے رون (RON) 92 پٹرول کی فروخت شروع کر دی جائے گی جس کے بعد پاکستان غیرمعیاری ایندھن استعمال کرنے والے ملکوں کی فہرست میں سے نکل کر معیاری، ماحول کے لیے نسبتاً زیادہ محفوظ ایندھن استعمال کرنے والے ملکوں میں شامل ہوجائے گا۔

حکومت کی ہدایت پر پاکستان اسٹیٹ آئل کمپنی نے رون 92 پٹرول کی خریداری کے لیے ٹینڈر جاری کردیے ہیں جس کے تحت 55 ہزار ٹن کی پہلی درآمدی کھیپ اکتوبر کے آخری ہفتے میں کراچی پہنچ جائے گی جبکہ عوامی فروخت کا آغاز یکم نومبر سے کیا جائے گا۔

بہتر معیار کے پٹرول کی درآمد کا فیصلہ اس رپورٹ کے سامنے آنے کے بعد کیا گیا جس کے مطابق پاکستان دنیا میں افریقی ملک صومالیہ کے بعد دوسرا ملک ہے جو پست معیار کا پٹرول استعمال کررہا ہے، پست معیار کے ایندھن کے استعمال سے ماحول کو نقصان پہنچنے کے ساتھ گاڑیوں کے انجن کی کارکردگی بھی متاثر ہوتی ہے۔

اس رپورٹ کی روشنی میں حکومت نے رون87 کی جگہ RON 92 ایندھن درآمد کرنے کا فیصلہ کیا جس پر عمل درآمد کے لیے کویت پٹرولیم سے رون 92 کی خریداری کے سودے طے کیے گئے ہیں۔

ذرائع کا کہنا ہے کہ بہتر معیار کے پٹرول کی قیمت متروک ہونے والے پٹرول کے مقابلے میں 2 روپے 70 پیسے فی لیٹر تک زائد ہوگی تاہم قیمت کا درست اندازہ حقیقی درآمدی لاگت اور بین الاقوامی مارکیٹ کی قیمتوں کو مدنظر رکھتے ہوئے ہی کیا جائے گا۔

واضح رہے کہ پاکستان کے پڑوسی ملک بھارت، بنگلہ دیش، ایران اور سری لنکا پہلے ہی رون 92 ایندھن استعمال کررہے ہیں۔