اسکاٹ لینڈ یارڈ نے الطاف حسین کے خلاف منی لانڈرنگ کیس ختم کردیا

کیس سے متعلق سرفراز مرچنٹ اور محمد انور سے بھی پوچھ گچھ مکمل کرکے ان کے خلاف بھی کیس ختم کردیا گیا ہے۔ فوٹو؛ فائل

---

اسکاٹ لینڈ یارڈ نے ایم کیوایم کےبانی الطاف حسین کے خلاف منی لانڈرنگ کیس ناکافی ثبوتوں کی بنا پر ختم کردیا۔



ایکسپریس نیوز کے مطابق اسکاٹ لینڈ یارڈ نے ایم کیوایم کے بانی الطاف حسین کے خلاف منی لانڈرنگ کا کیس ختم کردیا۔ اسکاٹ لینڈ یارڈ حکام کا کہنا ہے کہ منی لانڈرنگ کیس میں یہ ثابت نہیں ہوسکا کہ جو پیسے الطاف حسین کے گھر سے ملے وہ غلط طریقے سے آئے یا کسی غلط کام کی غرض سے لیے گئے تھے اور اس سلسلے میں ناکافی شواہد کی بنا پر کراؤن پراسیکیوشن کی جانب سے کیس ختم کرنے کی ہدایت جاری کی گئی جس پر کیس ختم کردیا۔



اسکاٹ لینڈ یارڈ حکام کے مطابق کیس سے متعلق سرفراز مرچنٹ اور محمد انور سے بھی پوچھ گچھ مکمل کرکے ان کے خلاف بھی کیس ختم کردیا گیا ہے۔



دوسری جانب وفاقی وزیر داخلہ چوہدری نثار نے اسکاٹ لینڈ یارڈ کی جانب سے الطاف حسین کے خلاف منی لانڈرنگ کیس ختم کیے جانے پر تشویش کا اظہار کیا ہے جب کہ چوہدری نثار اس حوالے سے اپنا باضابطہ بیان بھی جاری کریں گے۔



واضح رہے کہ اسکاٹ لینڈ یارڈ نے لندن میں ایجویر میں واقع الطاف حسین کی رہائش گاہ پر چھاپہ مار کر لاکھوں پاؤنڈز برآمد کیے تھے، کیس میں 11 افراد کو گرفتار کیا گیا تھا اور 100 سے زائد گواہان کا بیان لیا گیا تھا۔ اسکاٹ لینڈ یارڈ نے کیس میں الطاف حسین کو 3 جون 2014 کو حراست میں بھی لیا تھا جب کہ کیس میں متحدہ بانی کی ضمانت میں 4 مرتبہ توسیع بھی کی گئی تھی۔