پیپلزپارٹی کی ریلی میں چوری کی بجلی استعمال ہونے کا انکشاف

پولیس نے بلاول چورنگی سے مشکوک انداز میں وڈیو بنانے پر ایک شخص کو حراست میں لے لیا ہے، فوٹو : فائل

---

پیپلزپارٹی کی ریلی میں استقبال کے لیے لگائے گئے کیمپوں میں کنڈے لگا کر بجلی چوری کئے جانے کا انکشاف ہوا ہے جب کہ بلاول ہاؤس چورنگی کے اطراف سرگرم جیب کترے ریلی کے شرکاء سمیت کئی صحافیوں کے موبائل فونز اور نقدی لے اڑے۔

پیپلز پارٹی کی جانب سے آج سانحہ کارساز کے شہدا کو خراج عقیدت پیش کرنے کے لیے سلام شہداء ریلی نکالی جا رہی ہے جس کی قیادت پیپلز پارٹی کے چئیرمین بلاول بھٹوزرداری کر رہے ہیں تاہم ریلی کے استقبال کے لیے لگائے گئے کیمپوں میں کنڈے لگا کر بجلی چوری کی جارہی ہے، استقبالیہ کیمپوں میں لگائے گئے ساؤنڈ سسٹم کے لیے کنڈے کی بجلی استعمال کی جارہی ہے۔

ریلی میں جہاں جیالے جوشیلے انداز میں پارٹی ترانوں پر جھوم رہے ہیں وہیں ریلی میں جیب کترے بھی سرگرم ہیں، بلاول ہاؤس چورنگی کے اطراف سرگرم جیب کترے ریلی کے شرکاء سمیت کئی صحافیوں کے موبائل فونز اور نقدی لے اڑے جب کہ بلاول ہاوس چورنگی پر ریلی انتظامیہ کی جانب سے اعلانات بھی کیے جارہے ہیں کہ شرکا اپنے سامان کی حفاظت کریں اور جیب کتروں سے ہوشیار رہیں۔

دوسری جانب پولیس نے بلاول چورنگی سے ایک مشکوک شخص کو بھی حراست میں لے لیا ہے۔ ایس ایس پی ساؤتھ کا کہنا ہے کہ مشکوک شخص بلاول چورنگی پر مشکوک انداز میں وڈیو بنارہا تھا۔