طالبان کی افغان حکومت سے قطر میں مذاکرات کی تردید

طالبان اور افغان حکومت کے درمیان خفیہ مذاکرات کا سلسلہ ستمبر سے دوبارہ شروع ہوچکا ہے۔ فوٹو: فائل

---

طالبان نے افغان حکومت کے ساتھ قطر میں ہونے والے خفیہ مذاکرات کی رپورٹوں کو مسترد کرتے ہوئے کہا ہے کہ ان کی پالیسی میں کوئی تبدیلی نہیں آئی۔

ایک غیر ملکی خیر رساں ادارے کے مطابق طالبان ترجمان ذبیح اللہ مجاہد نے اپنے ایک بیان میں اس قسم کے مذاکرات یا ملاقات کی رپورٹوں کو مسترد کرتے ہوئے کہا ہے کہ امارات اسلامیہ کے نمائندوں کی ستنکزئی یا کسی اور عہدیدار سے ملاقات نہیں ہوئی۔ ان کا کہنا تھا کہ'' مذاکرات کے حوالے سے ہمارے موقف میں کوئی تبدیلی نہیں آئی ہماری پالیسی اس حوالے سے بالکل واضح ہے''۔

یاد رہے کہ برطانوی اخبار گارجین نے رپورٹ کیا تھا کہ طالبان اور افغان حکومت کے درمیان خفیہ مذاکرات کا سلسلہ ستمبر سے دوبارہ شروع ہوچکا ہے جبکہ بیشتر ذرائع سے پتہ چلتا ہے کہ اب تک مذاکرات کے دو دور قطر میں مکمل ہوچکے ہیں۔