ویمنز انڈر19 کرکٹ لاہور اور کراچی مشترکہ فاتح

بارش کے سبب فائنل میں ایک گیندبھی نہ ہو سکی،اقرا نواز ایونٹ کی بہترین پلیئر فوٹو : اے ایف پی / فائل

---

قومی ویمنز انڈر19 کرکٹ چیمپئن شپ میں لاہور اور کراچی کی ٹیمیں مشترکہ فاتح قرار پائیں،بارش کے باعث کنٹری کلب مریدکے میں فائنل کی ایک گیند بھی نہ پھینکی جاسکی۔

جس کے بعد دونوں ٹیموں میں 75 ہزار روپے کی انعامی رقم تقسیم کردی گئی، بہترین کھلاڑی سیالکوٹ کی اقراء نواز قرار پائیں، بیسٹ بولر کراچی کی ثناء عروج رہیں، ایونٹ کی بہترین بیسٹویمن کا ایوارڈ لاہور کی کنول فرانسس جبکہ وکٹ کیپر کا انعام راولپنڈی کی عائشہ فرقان کو ملا۔



ہر کیٹیگری کی بہترین پلیئر کو 10,10 ہزار روپے بطور انعام دیے گئے۔ پاکستان کرکٹ بورڈ کے چیئرمین چوہدری ذکاء اشرف نے پی سی بی ڈائریکٹر کرکٹ ڈیولپمنٹ انتخاب عالم کے ہمراہ انعامات تقسیم کیے۔ یاد رہے کہ فیصلہ کن معرکہ میں رسائی کیلیے کراچی اور لاہور کی ٹیموں نے راولپنڈی اور فیصل آباد کو زیر کیا تھا مگر گزشتہ روز بارش کے سب میچ کی ساری تیاری دھری کی دھری رہ گئی۔