شہریارخان نے دوبارہ چیئرمین کا عہدہ سنبھال لیا

ہاتھ میں چھڑی اور سر پر کیپ لیے دوپہرکوآفس آئے،سیٹھی و سبحان سے ملاقاتیں

Sports Reporter October 25, 2016

مختلف اہم امور زیر غور آئے،آج پریس کانفرنس میں مستقبل کا پلان ظاہرکریںگے ۔ فوٹو : فائل

شہریارخان نے دوبارہ چیئرمین پی سی بی کا عہدہ سنبھال لیا، وہ گذشتہ روز 2 گھنٹے قذافی اسٹیڈیم میں موجود رہے،چیف آپریٹنگ آفیسر سبحان احمد نے آئی سی سی اجلاس پر بریفنگ دی، بعد ازاں ایگزیکٹیو کمیٹی کے سربراہ نجم سیٹھی سے ملاقات میں مختلف امور زیر غور رہے۔

تفصیلات کے مطابق سانس لینے میں تکلیف محسوس کرنے پر چیئرمین پی سی بی شہریار خان کے دل کا آپریشن انگلینڈ میں ہوا تھا، اسپتال سے فارغ ہونے کے بعد ڈاکٹرز نے انھیں آرام کا مشورہ دیا تھا،سابق سفارتکار 2 ماہ تک لندن میں اپنی رہائش گاہ پر مقیم رہے،قواعد کے مطابق گورننگ بورڈ کی جانب سے کسی قائم مقام چیئرمین کا تقرر نہ کیے جانے پر اطلاعات گردش میں تھیں کہ سابق سفارتکار شاید اپنا عہدہ چھوڑ دیںگے لیکن انھوں نے وطن واپسی کے بعد اگلے ہی روز آسٹریلوی آرمی کرکٹ ٹیم کو دیے گئے عشائیہ میں شرکت کی، پیر کو وہ ہاتھ میں چھڑی اور سر پر کیپ لیے دوپہر 12بجے پی سی بی کے ہیڈ کوارٹرز قذافی اسٹیڈیم آئے اور2گھنٹے قیام کیا، ان کی آمد سے مخالفین کو شدید زک پہنچی ہے۔

شہریار خان کو پہلے چیف آپریٹنگ آفیسر سبحان احمد نے آئی سی سی اجلاس پر بریفنگ دی، بعد ازاں ایگزیکٹیو کمیٹی کے سربراہ نجم سیٹھی سے ملاقات میں مختلف امور پر بات چیت کی، بورڈ کے ملازمین ان کی خیریت دریافت کرتے ہوئے اچھی صحت کیلیے نیک خواہشات کا اظہار کرتے نظر آئے، گھر روانگی کے وقت نجم سیٹھی ان کو رخصت کرنے کیلیے گاڑی تک آئے، چیئرمین پی سی بی منگل کو قذافی اسٹیڈیم لاہور میں پریس کانفرنس کرکے میڈیا کے نمائندوں کو مستقبل کے پلان سے آگاہ کریںگے۔