پیپلزپارٹی اور جماست اسلامی کاسپریم کورٹ کے فیصلے کا خیر مقدم

انتخابی فہرستوں میں بے قاعدگی کیخلاف پہلے جماعت اسلامی نے آواز بلند کی، محنتی فوٹو: فائل

---

ISLAMABAD: پاکستان پیپلزپارٹی سندھ کے جنرل سیکریٹری تاج حیدر اور سیکریٹری اطلاعات عبداللطیف مغل نے جماعت اسلامی کراچی کے امیر محمد حسین محنتی سے ملاقات کی۔

اس دوران طرفین نے شفاف انتخابات کے انعقاد کیلیے ووٹر لسٹوں کی درستی کیلیے سپریم کورٹ کے فیصلے کا خیر مقدم کرتے ہوئے اس فیصلے پر فوری عمل درآمد کی ضرورت پر زور دیا اور اس امر پر اتفاق کیا کہ شفاف انتخابات کیلیے شفاف ووٹر لسٹوں کا ہوناضروری ہے، اس موقع پر جماعت اسلامی کے سیکریٹری نسیم صدیقی، برجیس احمدو دیگربھی موجود تھے۔



جبکہ تاج حیدر نے پاکستان پیپلزپارٹی کی جانب سے چیف الیکشن کمشنر فخر الدین جی ابراہیم کو لکھے جانے والے خط کے مندرجات سے بھی آگاہ کیا اور کہاکہ کراچی میں شفاف انتخابات کیلیے ناگزیر ہے کہ ووٹر لسٹیں درست کی جائیں اور رائے دہندگان کے ووٹ مقامی رہائشی پتے پر درج کیے جائیں،انھوں نے کہاکہ فوج اور ایف سی کے اہلکاروں کا کردار صرف سیکیورٹی کی حد تک ہونا چاہیے، محمد حسین محنتی نے کہاکہ انتخابی فہرستوں میں ہونے والی بے قاعدگی کیخلاف جماعت اسلامی نے سب سے پہلے آواز بلند کی،انھوں نے کہا کہ شہر کا امن شفاف انتخابات کے انعقاد سے وابستہ ہے اور ہم اس سلسلے میں سیاسی جماعتوں سے تعاون کیلیے تیار ہیں۔