کراچی کے علاقے کورنگی میں پولیس کی کارروائی 3 دہشت  گرد ہلاک

ملزمان کے قبضے سے بارودی مواد اور پرائم کارڈ ڈیٹونیٹرز برآمد کیے گئے، سی ٹی ڈی ، فوٹو: فائل

---

کورنگی میں کاؤنٹر ٹیررازم پولیس نے کارروائی کر کے 3 دہشت گردوں کو ہلاک کر دیا جب کہ لیاری سمیت متعدد علاقوں میں کارروائی کر کے 55 مشتبہ افراد کو حراست میں لے لیا۔

ایکسپریس نیوز کے مطابق سی ٹی ڈی پولیس نے دہشت گردوں کی موجودگی کی مصدقہ اطلاع پر کورنگی کاز وے پر کارروائی کر کے 3 دہشت گردوں کو ہلاک کردیا جب کہ مقابلے میں ایک پولیس اہکار زخمی بھی ہوا۔ ایس ایس پی کورنگی جنید شیخ کے مطابق ہلاک کیے گئے تینوں دہشت گردوں کا تعلق کالعدم جماعت سے ہے، دہشت گردوں کے قبضے سے دستی بم، اسلحہ اور گولیاں برآمد ہوئیں۔

اس خبر کو بھی پڑھیں: کراچی سے 4 مبینہ دہشت گرد گرفتار

ادھر کراچی کے علاقے لیاری آگراہ تاج میں قانون نافذ کرنے والے ادارے نے کارروائی کر کے 2 ملزمان کو گرفتار کر لیا۔ ذرائع کے مطابق گرفتار ملزموں کا تعلق لیاری گینگ وار سے ہے جب کہ ملزمان کو تفتیش کے لئے نامعلوم مقام پر منتقل کر دیا گیا ہے۔ دوسری جانب پولیس نے بلوچ کالونی تھانے کی حدود میں جونیجو ٹاون اور دادا بھائی ٹاون میں پولیس نے نینشل ایکشن پلان کے تحت سرچ آپریشن کیا۔ تلاشی کے دوران 37 مشتبہ افراد کو حراست میں لے لیا گیا۔ پولیس کے مطابق زیر حراست افراد سے شناختی قوائف طلب کرکے تفتیش کی جارہی ہے۔ صدر کے علاقے پریڈی میں بھی پولیس نے سرچ آپریشن کر کے 16 مشتبہ افراد کو حراست میں لے لیا۔