فضائی کارروائیوں سے دہشت گردوں کو بے اثر کر دیا ایئرچیف

پاک فضائیہ کے سربراہ ایئرچیف مارشل سہیل امان نے روم میں اٹلی کے چیف آف ڈیفنس جنرل کلاڈیؤگرازیانو سے ملاقات کی۔ بات چیت کے دوران پیشہ ورانہ دلچسپی کے مختلف امور پرتبادلہ خیال کیا۔

اٹلی کے چیف آف ڈیفنس جنرل کلاڈئیو نے دہشت گردی کیخلاف جنگ میں پاک افواج بالخصوص ایئرفورس کے بے مثال عزم کو سراہا۔


ایئرچیف مارشل سہیل امان نے اطالوی تھنک ٹینک کوآپریشن ضرب عضب میں پی اے ایف کے نمایاں کردار کے حوالے سے آگاہ کرتے ہوئے کہاکہ پاک فضائیہ نے انتہائی لگن سے دن رات اورتمام موسمی حالات میں فضائی حملوں سے دہشت گردوں کے کمانڈ اینڈ کنٹرول سینٹرز، گولہ بارودکے ذخائر،خفیہ ٹھکانوں اور بنکروں کو بے اثرکردیا۔ انھوں نے کہاکہ دہشت گردوں کیخلاف پاک فضائیہ کے ان آپریشنز نے پاک آرمی کیلیے کم سے کم مزاحمت کیساتھ زمینی حالات کو ساز گار بنایا۔