امریکا میں سیاہ فام عیسائیوں کا چرچ نذرآتش

چرچ نذر آتش کرنے والوں نے دیواروں پر ڈونلڈ ٹرمپ کی حمایت میں نعرے بھی درج کئے۔

ویب ڈیسک November 03, 2016

حادثے کی ہر طرح سے تحقیقات کر رہے ہیں اور ملوث عناصر کیخلاف سخت کارروائی کی جائے گی، ایف بی آئی۔ فوٹو: سوشل میڈیا

امریکی ریاست میسی سپی میں سیاہ فام عیسائیوں کے گرجا گھرکو آگ لگا نذرآتش کردیا گیا۔

غیر ملکی خبررساں ادارے کے مطابق امریکی ریاست میسی سپی کے علاقے گرینفیل میں سیاہ فام عیسائیوں کے گرجا گھرکو نامعلوم افراد نے نذرآتش کردیا۔ حملہ آوروں نے گرجا گھرکوجلانے کے بعد امریکی صدارتی انتخاب کے لئے ریپبلکن پارٹی کے امیدوارڈونلڈ ٹرمپ کی حمایت میں نعرے بھی درج کئے۔

امریکی وفاقی تحقیقاتی ادارے ایف بی آئی حکام کے مطابق چرچ کو آگ لگائے جانے کے واقعے کی تحقیقات کررہے ہیں۔ فائربریگیڈ حکام سربراہ روبن براؤن نے فون پربتایا کہ چرچ میں آتش زدگی کے نتیجے میں کسی قسم کا جانی نقصان نہیں ہوا تاہم چرچ کا اندرونی حصہ آگ لگنے سے بری طرح متاثرہوا ہے۔

ایف بی آئی حکام کا کہنا ہے کہ قانون نافذ کرنے والے ادارے واقعہ کی ہرطح سے تحقیقات کر رہے ہیں، چرچ کو نذر آتش کرنے میں ملوث عناصر کے ساتھ سختی سے نمٹا جائے گا۔