کوئی جتھا باہر نکل کر حکومت پر اپنی رائے نہیں تھوپ سکتا چوہدری نثار

پرویزخٹک اگر دوبارہ بھی انتشار پھیلانے اسلام آباد آئیں گے تو ان کا حشر پتھر گڑھ والا ہی ہوگا، وزیر داخلہ

ویب ڈیسک November 03, 2016

ملک میں 10 سال بعد پولیس اور سکیورٹی فورسز نے قانون کی عملداری کو یقینی بنایا، وزیر داخلہ فوٹو؛ فائل

وفاقی وزیر داخلہ چوہدری نثار کا کہنا ہے کہ پرویزخٹک جب بھی وزیراعلیٰ کے طور پر آئیں گے انہیں مکمل پروٹو کول دیں گے لیکن اگر انتشار پھیلانے آئیں گے تو پتھر گڑھ والا حشر ہوگا۔

پولیس لائن اسلام آباد میں تقریب سے خطاب کے دوران وزیرداخلہ چوہدری نثار کا کہنا تھا کہ پرویز خٹک صاحب سمیت ہر سیاسی لیڈر کو خوش آمدید کہتے ہیں ہم نے ساڑھے تین سال کسی دھرنی یا جلسی میں بھی رکاوٹ نہیں ڈالی، وزیراعلیٰ خیبر پختونخوا پرویز خٹک سے 40 سال پرانی دوستی ہے لیکن کل جلسے میں جو اعتراضات کیے اس پر افسوس ہے، ہم ملک میں امن چاہتے ہیں انتشار نہیں، لیکن وہ اپنے ساتھ مسلح گارڈز کو لائے تھے، پرویزخٹک جب بھی وزیراعلیٰ کے طور پر آئیں گے انہیں مکمل پروٹو کول دیں گے لیکن اگر انتشار پھیلانے آئیں گے تو ان کا حشر پتھر گڑھ والا ہوگا۔ انہوں نے پرویز خٹک کو مخاطب کرتے ہوئے کہا کہ ایف سی صرف پاکستان کی فورس ہے یہ نہ خیبر پختونخوا ، نہ پنجاب اور نہ سندھ کی ہے لہذا سیکیورٹی اداروں کو سیاست میں نہ گھسیٹا جائے۔

چوہدری نثار نے سیکیورٹی انتظامات پر پولیس کی کارکردگی کو سراہتے ہوئے کہا کہ آپ حق پر تھے، آپ کسی کو پکڑنے، کسی کو گرفتار کرنے یا پکڑنے کے لیے نہیں نکلے تھے اور کل ہم نے اس بات کو بھی ثابت کردیا، کل جب کے پی کے سے جلوس آیا تو ہم نے سیکیورٹی دی تاہم پولیس کی جانب سے قانون کی عملداری اور فرائض کی بہترین انجام دہی پر نہ صرف تہہ دل سے شکرگزار ہوں بلکہ انہیں مبارکباد بھی پیش کرتا ہوں۔ ان کا کہنا تھا کہ ملک میں 10 سال بعد پولیس اور سکیورٹی فورسز نے قانون کی عملداری کو یقینی بنایا لہذا اب کوئی بھی باہر نکل کر اپنی رائے حکومت پر نہیں تھوپ سکتا۔

وزیرداخلہ نے کہا کہ میں نے پہلے بھی کہا تھا کہ یہ کسی کی جیت یا ہار نہیں لیکن عمران خان نے دھرنا ختم کر کے اچھا فیصلہ کیا۔ ان کا کہنا تھا کہ بحیثیت وزیرداخلہ مجھے پولیس کے مسائل معلوم ہیں جب کہ عوام نہیں جانتے کہ پولیس اور سکیورٹی فورسز کس ماحول میں کام کرتے ہیں۔