بھارتی دارالحکومت نئی دلی میں فضائی آلودگی کے باعث اسکول بند

میونسپل انتظامیہ کےفیصلے سے9 لاکھ طالبعلم متاثرہوں گے جبکہ صرف میونسپلٹی کے تحت چلنے والے 1800 اسکول بھی بند رہیں گے۔

ویب ڈیسک November 04, 2016

میونسپل انتظامیہ کےفیصلے سے9 لاکھ طالبعلم متاثرہوں گے جبکہ صرف میونسپلٹی کے تحت چلنے والے 1800 اسکول بھی بند رہیں گے۔ فوٹو: فائل

ISLAMABAD: حالیہ بدترین فضائی آلودگی کے باعث بھارتی دارالحکومت نئی دلی کی انتظامیہ نے شہر بھر میں اسکول بند کرنے کے احکامات جاری کردیئے۔

غیرملکی خبررساں ادارے کے مطابق گزشتہ ہفتے دیوالی کی تقریبات کے دوران آتشبازی کے باعث شہر بھر میں دھند کا راج ہے جس کے پیش نظر انتظامیہ نے شہر بھر کے اسکول بند کرنے کے احکامات جاری کردیئے۔ میونسپل انتظامیہ کے فیصلے سے 9 لاکھ طالب علم متاثر ہوں گے جب کہ میونسپلٹی کے تحت چلنے والے 1800 اسکول بھی بند رہیں گے۔

دوسری جانب حکومت کے اعلان سے قبل ہی شہر کے بعض علاقوں میں نجی اسکولوں نے چھٹیوں کو اعلان کردیا جب کہ بعض اسکولوں کی جانب سے اعلان کیا ہے کہ جب تک فضا میں آلودگی کا تناسب قابو میں نہیں آتا اس وقت تک تعلیمی سرگرمیاں معطل رہیں گی۔

نئی دلی میں فضائی آلودگی کو گزشتہ 17 سال کی بدترین آلودگی قرار دیا جارہا ہے جب کہ ماہرین کا کہنا ہے کہ نئی دلی میں شہری آبادی کا تناسب بڑھنے اور ڈیزل انجن گاڑیاں، کوئلے سے چلنے والے پلانٹ اور صنعتی اخراج کے باعث شہر میں آلودگی بڑھ رہی ہے جب کہ شہر کے نواح میں دیہی علاقوں میں بھی کھیتوں کو آگ لگانے سے آلودگی میں تیزی سے اضافہ ہورہا ہے۔