سلطان آف جوہر ہاکی آسٹریلیا نے گرین شرٹس پر گولز کی بوچھاڑ کردی

انگلینڈ نے نیوزی لینڈ، جاپان نے ملائیشیا پر ہاتھ صاف کرلیا۔ فوٹو: سلطان آف جوہر ویب سائٹ

---

سلطان آف جوہر جونیئر ہاکی کپ میں آسٹریلیا نے گرین شرٹس پرگولزکی بوچھاڑ کردی،فاتح ٹیم نے یکطرفہ مقابلے میں8-1 کی فتح سے حریف کو دوسری سے چوتھی پوزیشن پر دھکیل دیا، ٹام کریگ نے ہیٹ ٹرک مکمل کی، ریان پروکٹر نے2 بار گیند کو جال کے اندر پھینکا جبکہ فریزر، میکس ہینڈری اور بلیک گوور نے ایک، ایک گول کیا، پاکستانی ٹیم کا واحد گول محمد عتیق نے بنایا، دفاعی چیمپئن انگلینڈ نے نیوزی لینڈ پر4-2 سے ہاتھ صاف کیا جبکہ جاپان نے ملائیشیا کو ایک کے مقابلے میں2 گول سے زیر کرلیا، ہفتے کو ایونٹ کے مزید3 میچز ہوں گے، پاکستانی ٹیم پہلے مرحلے کے آخری مقابلے میں جاپان کیخلاف ایکشن میں دکھائی دے گی۔

تفصیلات کے مطابق سلطان آف جوہر جونیئر ہاکی کپ میں گذشتہ روز مزید3 میچزکا فیصلہ ہوگیا، آسٹریلیا، جاپان اور انگلینڈ کی ٹیمیں کامیاب رہیں، آسٹریلیا نے پاکستان کو ایک کے مقابلے میں8گول کے بڑے مارجن سے ہرا کر دوسرے سے چوتھے نمبر پر دھکیل دیا، میچ کے دوران پاکستانی کھلاڑی نفسیاتی دباؤ کا شکار رہے جس کا بھرپور فائدہ کینگروز نے اٹھایا اور70منٹ کے کھیل میں8 بار گیند کو جال کے اندر پھینک کر میچ کانتیجہ اپنے نام کیا۔

کھیل کے آغاز میں ہی آسٹریلوی پلیئرز خطرناک موڈ میں نظر آئے اور انھوں نے گرین شرٹس کے خلاف گھیرا تنگ کرتے ہوئے ابتدائی20 منٹ میں3 گولز کی سبقت حاصل کر لی،5ویں منٹ میں ٹام کریگ آسٹریلیا کی طرف سے ابتدائی گول کرنے میں کامیاب ہو گئے،12ویں منٹ میں ٹام نے ایک بار پھر گیند کو جال کی راہ دکھا کر اپنی ٹیم کی برتری دوگنی کردی،16ویں منٹ میں بلیک گوور نے پنالٹی کارنر کے ذریعے گول کرکے اسکور3-0 کر دیا،25ویں منٹ میں محمد عتیق نے گیندکو جال کا راستہ دکھا کر پاکستانی ٹیم کا خسارہ کم کرنا چاہا،34ویں منٹ میں ٹام گریگ نے نہ صرف گولز کی ہیٹ ٹرک مکمل کی بلکہ اسکور4-1 کر کے کینگروز کی میچ پر گرفت بھی مضبوط بنا دی۔

دوسرے ہاف میں بھی آسٹریلوی ٹیم نے عمدہ کھیل کا سلسلہ جاری رکھا اور مزید 4 گول کر کے میچ کا نتیجہ اپنے نام کیا، ریان پروکٹر نے2 بار گیند کو جال کے اندر پھینکا جبکہ فریزر اور میکس ہینڈری نے ایک، ایک گول کیا، میچ میں ناکامی کے بعد پاکستان دوسرے سے چوتھے نمبر پر آ گیا، یاد رہے کہ گرین شرٹس نے ایونٹ میں مجموعی طور پر4 میں سے 2 میچز میں کامیابی حاصل کی، ایک میں ناکامی کا سامنا رہا جبکہ ایک برابری کی سطح پر ختم ہوا۔

پوائنٹس ٹیبل میں پاکستان اور انگلینڈ دونوں کے7، 7 پوائنٹس ہیں لیکن بہتر گول اوسط کی وجہ سے انگلش ٹیم تیسری پوزیشن پر قبضہ جمانے میں کامیاب رہی، آسٹریلیا10پوائنٹس کے ساتھ بدستور پہلے نمبر پر ہے جبکہ جاپانی ٹیم9 پوائنٹس کے ہمراہ دوسری پوزیشن حاصل کرنے میں کامیاب رہی، ملائیشیا ایک پوائنٹ لے کر پانچویں جبکہ نیوزی لینڈآخری نمبر پر ہے۔

گذشتہ روز کے دیگر مقابلوں میں دفاعی چیمپئن انگلینڈ نے نیوزی لینڈ پر4-2 سے ہاتھ صاف کیا جبکہ جاپان نے ملائیشیا کو ایک کے مقابلے میں2 گول سے زیرکرلیا، ہفتے کومزید3 میچز ہوں گے، پہلا میچ انگلینڈ اور آسٹریلیا کے درمیان شیڈول ہے، دوسرے میچ میں پاکستانی ٹیم جاپان کیخلاف ایکشن میں دکھائی دے گی جبکہ ملائیشین سائیڈ کو نیوزی لینڈ سے نبرد آزما ہونا ہے۔