ایرانی برتاؤنیوکلیئرمعاہدے کے بعد بھی تبدیل نہیں ہوا امریکا

پورے خطے خصوصاً شام اور یمن کے حوالے سے ایرانی رویہ غیرتعمیری ہے،تہران اپنا رویہ تبدیل کرے

این این آئی November 08, 2016

امریکا دشمنی پر مبنی نعرے انتہاپسند سیاسی موقف کے ترجمان ہیں،ترجمان امریکی محکمہ خارجہ فوٹو: فائل

امریکی وزارت خارجہ کے ترجمان مارک ٹونرنے کہاہے کہ ایران کا خطے میں برتاؤ بالخصوص شام اور یمن کے حوالے سے رویہ غیر مثبت اور غیر تعمیری ہے۔

غیرملکی خبررساں ادارے کے مطابق گزشتہ روز معمول کی بریفنگ کے دوران امریکی محکمہ خارجہ کے ترجمان مارک ٹونر نے ایران سے مطالبہ کیا کہ وہ پورے خطے میں خاص طور پر شام اور یمن کے حوالے سے اپنے رویے کو تبدیل کرے۔ امریکی ترجمان نے باور کرایا کہ خطے میں ایران کا برتاؤ ایٹمی معاہدے کے بعد بھی تبدیل نہیں ہوا۔

امریکی وزارت خارجہ کے ترجمان نے کہا کہ ایران میں امریکا دشمنی پر مبنی نعرے انتہا پسند سیاسی موقف کی ترجمانی کرتے ہیں، تاہم یہ ایران اور امریکا کے درمیان تعاون کی راہ میں رکاوٹ ہر گز نہیں بنیں گے۔انھوں نے مزید کہا کہ ہم خطے میں بالخصوص شام ، یمن اور مشرق وسطی کے دیگر علاقوں کے حوالے سے ایران کے مستقبل کے رویے کی جانب دیکھ رہے ہیں اور امید کرتے ہیں کہ اس کا موقف مثبت اور تعمیری ہوگا۔