سانگھڑ سے نوابشاہ جانے والی وین کے گیس سلنڈر پھٹنے سے آگ بھڑک اٹھی جس سے شادی کی تقریب سے واپس آنے والے 12 مسافر زخمی ہوگئے۔
وین کے مسافروں کے مطابق شاہ پور چاکر کے قریب گوٹھ دائم خان دھامرا پر ان کی وین کے سلنڈر میں آگ بھڑک اٹھی جس نے دیکھتے ہی دیکھتے پوری وین کو اپنی لپیٹ میں لے لیا۔ وین میں موجود افراد نے گاڑی کے شیشے توڑ کر اپنی جان بچائی۔
واقعے کی اطلاع ملتے ہی مقامی افراد نے تمام زخمیوں کو اپنی مدد آپ کے تحت پی ایم سی اسپتال نوابشاہ منتقل کردیا جہاں انہیں طبی امداد فراہم کی جارہی ہے۔ طبی عملے کے مطابق زخمیوں میں سے 2 کی حالت تشویشناک ہے.
واضح رہے کہ مسافر گاڑیوں میں ناقص سلنڈر کے باعث گاڑیوں میں آتشزدگی کے واقعات روز کا معمول بنتے جارہے ہیں۔