پریمیئر لیگ فٹبال کے آر ایل کے کلیم اللہ کی ہیٹ ٹرک

کلبز لیگ میں ینگ بلڈ ساہیوال نے چاند ایف سی لیہ کو 2-1سے مات دی۔ فوٹو: فائل

---

پاکستان پریمیئرفٹبال لیگ میں کے آر ایل نے واپڈا کو4-1 سے ٹھکانے لگا دیا۔

چاروں گول اسٹرائیکر کلیم اللہ نے داغے۔ پی ایف ایف ڈپارٹمنٹل لیگ میں پاک کلیئرنگ ایجنسی نے ہائر ایجوکیشن کمیشن کو 4-0جبکہ سوئی سدرن گیس نے ریلوے کو 1-0 سے ہرا دیا۔ ریلوے اسٹیڈیم لاہور کے آر ایل اور واپڈا کا میچ یکطرفہ ثابت ہوا،کلیم اللہ نے20،27،33 اور 65 ویں منٹ میں گول کیے، ناکام ٹیم کا واحدگول احمد نے 85 ویں منٹ میں بنایا، وسیم کو32 جبکہ فاتح ٹیم کے شاہد ، کامران اور محمود کو بالترتیب 28،61 اور 80 ویں منٹ میں یلو کارڈز کا سامنا کرنا پڑا، میچ کے بہترین اسکورر کلیم اللہ اور بیسٹ کھلاڑی کے آر ایل کے مڈ فیلڈرمحمود خان ٹھہرے۔ منگل کو پی آئی اے اور ایئر فورس جبکہ نیشنل بینک و پی ایم سی ایتھلیٹکو فیصل آباد کے میچز ہوں گے۔



دریں اثنا پی ایف ایف ڈپارٹمنٹل لیگ میں پاک کلیئرنگ ایجنسی نے ہائر ایجوکیشن کمیشن کو 4-0 سے ہرا دیا، فیم فٹبال گرائونڈ لاہور میں اسٹرائیکر سراج الدین نے 2 جبکہ مڈ فیلڈر معاذ اور اسٹرائیکر عبدالہادی نے ایک، ایک بار بال کو جال میں پہنچایا۔ ریلوے گرائونڈ لاہور میں میزبان ٹیم کو سوئی سدرن کے ہاتھوں ایک گول سے شکست کا سامنا کرناپڑا، میچ کا واحد گول اسٹرائیکر عمران علی نے کیا،ایس ایس جی کے ڈیفنڈر جہانزیب اور مڈ فیلڈر صابر جبکہ ریلوے کے اسٹرائیکر شیرا اور مڈ فیلڈر سرور کو یلو کارڈز دکھائے گئے۔

کلبز لیگ میں ینگ بلڈ ساہیوال نے چاند ایف سی لیہ کو 2-1سے مات دی، فاتح ٹیم کے دونوں گول محمد نعیم جبکہ ناکام ٹیم کا واحد گول فضل عباس نے کیا۔ دوسرے میچ میں بالاچ کلب نے یونیورسٹی ایف سی فیصل آبادکو 4-0 سے زیر کیا،اسٹرائیکر رضوان علی نے 2 جبکہ، مڈ فیلڈر یاسر اقبال اور اسٹرائیکر رضوان صفدر نے ایک،ایک گول کیا۔