ٹرمپ نے دوبارہ مسلمانوں کیخلاف زہر اگلنا شروع کر دیا

آفیشل ویب سائٹ پر بیان دوبارہ پوسٹ، امریکا میں باحجاب مسلمان لڑکیوں پر حملے

News Agencies November 12, 2016

خاتون کے مطابق حملہ آور سفید فام نوجوان تھا، جس نے حملہ کرکے اس کاحجاب اتاردیا۔ فوٹو: فائل

امریکی صدر منتخب ہونے کے فوری بعد ڈونلڈ ٹرمپ نے دوبارہ مسلمانوں کیخلاف زہر اگلنا شروع کر دیا اور مسلمان مخالف بیانات کو ایک مرتبہ پھراپنی ویب سائٹ پر اپ لوڈکردیا اور اس کا لنک بھی سوشل میڈیا پرشیئرکردیا۔ دریں اثنا امریکا کے مختلف شہروں میں باحجاب مسلمان لڑکیوں پرحملے کیے گئے۔ امریکی پولیس اور انتظامیہ کے مطابق کیلی فورنیا اور سان ڈیگو کی یونیورسٹیز میں باحجاب مسلم طالبات پر حملوںکی تحقیقات شروع کر دی گئی ہے۔

غیر ملکی میڈیا کے مطابق ڈونلڈ ٹرمپ کی آفیشل ویب سائٹ پر مسلمانوں پرمکمل پابندی کی تجویز کے حوالے سے بیان کودوباہ پوسٹ کر دیا گیا ہے، یہ بیان ڈونلڈ ٹرمپ کی ویب سائٹ پر امریکی صدارتی انتخابات تک دیکھا گیا تاہم پولنگ والے روز ایک سازش کے تحت ہٹایا گیا اب دوبارہ پوسٹ کردیا گیا ۔ ٹرمپ نے پچھلے سال دسمبر میں سوشل میڈیا پرغیر ملکیوں کے حوالے سے اپنے ایجنڈے کو بیان کرتے ہوئے متنازع بیان دیاتھا کہ امریکا میں مسلمانوں کے داخلے پراس وقت تک مکمل پابندی ہونی چاہیے جب تک امریکی نمائندے ملکی حالات کا پوری طرح جائزہ نہ لے لیں۔

پولیس کے مطابق سان ڈیاگو یونیورسٹی کیمپس کی باحجاب مسلم لڑکیوں پر کیمپس کے قریب پارکنگ پلازہ میں حملہ کیا گیا بعد ازاں متاثر لڑکیوں کی گاڑی بھی غائب ہوگئی۔یونیورسٹی انتظامیہ نے واقعے کی مذمت کرتے ہوئے لڑکیوں سے اظہار ہمدری کی۔ نارتھ کیرولاینا میں بھی سان جوز اسٹیٹ یونیورسٹی کے قریب پیدل چلنے والی باحجاب مسلم خاتون پرسفید فام نوجوان امریکی نے حملہ کردیا۔

خاتون کے مطابق حملہ آور سفید فام نوجوان تھا، جس نے حملہ کرکے اس کاحجاب اتاردیا۔ مسلم خاتون پر حملے کے بعد کیلی فورنیا کے اٹارنی جنرل کمالا ہارس نے تمام قانون نافذ کرنے والے اداروں کو الرٹ جاری کردیا۔ادھر لوزیانا اسٹیٹ یونیورسٹی میں بھی ایک18سالہ باحجاب مسلم طالبہ پر 2 امریکی نوجوانوں کے حملے کی رپورٹ ملی ہے۔