ٹیبل ٹینس محسن رضا نے مینز سنگلز ٹائٹل جیت لیا

محسن رضا نے دلچسپ مقابلے کے بعد محمد مزمل کو 3-1 سے زیر کر کے چوتھے ڈاکٹر عیسٰی محمد کراچی اوپن ٹیبل ٹینس چیمپئن شپ کا مینز سنگلز ٹائٹل جیت لیا۔

محسن کی اہلیہ غالیہ نے اپنی بہن ملیحہ خورشید کو سخت مقابلے کے بعد 3-2 سے شکست دے کر ویمنز سنگلزایونٹ اپنے نام کرلیا۔ کراچی ٹیبل ٹینس ایسوسی ایشن کے تحت اور پاکستان اسپورٹس بورڈ کے تعاون سے پی ایس بی کوچنگ سینٹر پر اختتام پزیر ہونے والی چیمپئن شپ کے مینز سنگلز کے فائنل میں محسن رضا نے اپنے حریف کیخلاف11-6,5-11,11-9 اور11-9سے کامیابی حاصل کی۔




ویمنز سنگلز کے فائنل میں حبیب بینک کی غالیہ نے ملیحہ کو 13-11,11-6, 9-11,4-11اور 11-6سے شکست دی۔بوائز انڈر۔18 ایونٹ کے فائنل میں تابش خورشید نے مہدی رضا کو باآسانی 11-8,11-7اور 11-9سے ہرا دیا، اقراء سعید نے حلیمہ علی کو 11-5,11-8 اور 11-4 سے ہرا کر گرلزانڈر۔18 کا ٹائٹل اپنے نام کیا۔

اختتامی تقریب کے مہمان خصوصی ڈاکٹر فرحان عیسٰی نے مختلف ایونٹس میں کامیابیاں حاصل کرنے والے کھلاڑیوں میں انعامات تقسیم کیے۔