فرانس میں بالی ووڈ اداکارہ ملیکا شراوت پرحملہ

3 نقاب پوش افراد نے اداکارہ پر گیس اسپرے کرکے انہیں تشدد کا نشانہ بنایا۔ فوٹو؛ فائل

---

بالی ووڈ میں بولڈ مناظر کی عکس بندی کے حوالے سے شہرت رکھنے والی اداکارہ ملیکا شراوت پر پیرس میں لٹیروں نے آنسو گیس کا اسپرے کیا اور مارپیٹ کرکے فرار ہوگئے۔

فرانس کے شہر پیرس میں بالی ووڈ اداکارہ ملیکا شراوت کو گھر جاتے ہوئے 3 نقاب پوش افراد نے گیس اسپرے کرکے تشدد کا نشانہ بنایا جس کے بعد وہ فرار ہوگئے تاہم واقعے میں اداکارہ کو معمولی چوٹیں آئی ہیں جب کہ اداکارہ نے فوری طور پر پولیس کوواقعے کی اطلاع کی جس کے بعد تحقیقات کا آغاز کردیا گیا ہے۔

پولیس کے مطابق گزشتہ دنوں اسی مقام پر ہالی ووڈ اداکارہ کم کارڈیشان کو لوٹا گیا تھا جس کے بعد اداکارہ ملیکا شراوت کے ساتھ ہونے والے واقعے میں ڈکیتی کا امکان مسترد نہیں کیا جاسکتا جب کہ اداکارہ کے ساتھ واقعہ 11 نومبر کی رات پیش آیا۔

واضح رہے کہ گزشتہ دنوں ہالی ووڈ اداکارہ کم کارڈیشان کو 2 افراد نے یرغمال بنا کر ایک کروڑ 10 لاکھ یورو مالیت کا جیولری باکس اپنے ساتھ لے گئے تھے۔