ڈوپلیسی پر ایک میچ کی پابندی کا خطرہ منڈلانے لگا

آئی سی سی نے باضابطہ طور پر بال ٹیمپرنگ کا الزام عائدکر دیا،ٹیم کا اظہارِ برہمی

Sports Desk November 19, 2016

بطور ٹیم ہم سمجھتے ہیں کہ کچھ غلط نہیں کیا، ڈوپلیسی پر الزامات مضحکہ خیز ہیں، ہاشم آملا۔ فوٹو: فائل

PESHAWAR: جنوبی افریقی کپتان فاف ڈوپلیسی پر ایک میچ کی پابندی کا خطرہ منڈلانے لگا، ان پر آئی سی سی نے باضابطہ طور پر بال ٹیمپرنگ کا الزام عائدکر دیا، ٹیم نے ہوبارٹ میں منعقدہ دوسرے ٹیسٹ میں آسٹریلیا کواننگز اور80 رنز سے شکست دی تھی۔

گذشتہ دنوں میچ کے چوتھے روز کی ایک فوٹیج منظر عام پر آئی جس میں ڈوپلیسی کو منٹ والی ٹافی کے تھوک سے گیند کو چمکاتے ہوئے دیکھا جا سکتا ہے،آئی سی سی نے اس کا نوٹس لیا اور اب ڈوپلیسی ایک میچ کی پابندی کا شکار ہو سکتے ہیں، ان پر 'گیند کی ساخت کی تبدیلی' کے حوالے سے قوانین توڑنے کا الزام عائد کیا گیا ہے، اس حوالے سے ڈوپلیسی کی میچ ریفری اینڈی پائی کرافٹ کے سامنے پیشی ہو گی، لیول ٹو پر 50سے100 فیصد میچ فیس کا جرمانہ عائد کیے جانے کے ساتھ 2 معطلی اور 3سے 4منفی پوائنٹس دیے جاتے ہیں۔

معطلی کے پوائنٹس ایک ٹیسٹ کی پابندی کے برابر ہوتے ہیں، ڈوپلیسی نے الزامات ماننے سے انکار کرتے ہوئے بے گناہ ہونے پر اصرار کیا ہے، یاد رہے کہ کرکٹ آسٹریلیا نے اس معاملے کی شکایت نہیں کی تھی، یہ پہلا موقع نہیں کہ ڈوپلیسی بال ٹیمپرنگ کے سبب آئی سی سی کی نظروں میں آئے،2013 میں انھوں نے پاکستان سے دبئی ٹیسٹ کے دوران ٹراؤزر کی زپ سے گیند کو رگڑا تھا، امپائرز نے جنوبی افریقی ٹیم کے خلاف پانچ رنز کی پنالٹی دینے کے ساتھ ڈوپلیسی پر میچ فیس کا 50 فیصد جرمانہ بھی عائد کیا تھا۔

دوسری جانب جنوبی افریقی بیٹسمین ہاشم آملا نے کپتان پر عائد الزامات پر برہمی کا اظہار کرتے ہوئے کہا کہ ہم سب ان کے ساتھ اور اظہار یکجہتی کرتے ہیں، ہماری نظر میں یہ سب کچھ کسی مذاق سے کم نہیں ہے، بطور ٹیم ہم سمجھتے ہیں کہ کچھ غلط نہیں کیا، ڈوپلیسی پر الزامات مضحکہ خیز ہیں۔