ممبئی حملوں کی تحقیقات کے لئے بھارتی کمیشن کل پاکستان آئے گا رحمان ملک

وزیر داخلہ رحمان ملک نے کہا ہے کہ ممبئی حملوں کی تحقیقات کے لئے بھارتی کمیشن کل پاکستان آئے گا۔

اسلام آ باد میں میڈیا سے بات کرتے ہوئے رحمان ملک نے کہا کہ ان کا دورہ بھارت انتہائی کامیاب رہا، وہ امن اور محبت کا پیغام لے کر بھارت گئے تھے، ہندوستان میں دونوں ممالک کے درمیان مسائل کے حل کے لئے میرے مؤقف کو سراہا گیا۔ انہوں نے کہا کہ دونوں ممالک دہشت گردی اورغربت کے خاتمے کے لئے پرعزم ہیں، 38 سال بعد پاک بھارت ویزا پالیسی تبدیل کی گئی۔

وزیرداخلہ نے کہا کہ انسداد پولیو مہم ٹیم کو ہدایت کی گئی تھی کہ بغیر سیکیورٹی کے نہ جایا جائے لیکن اس سلسلے میں ہدایت کو نظر انداز کیا گیا۔ انہوں نے کہا کہ انسداد پولیو مہم ٹیم متعلقہ تھانے میں اطلاع دے کر سیکیورٹی کے ہمراہ جائیں۔