نعیم الحق کی جگہ فواد چوہدری تحریک انصاف کے ترجمان مقرر

نعیم الحق کے پاس مرکزی سیکریٹری اطلاعات کا عہدہ رہے گا، ذرائع - فوٹو: فائل

---

چیرمین پی ٹی آئی عمران خان نے نعیم الحق کو پارٹی ترجمان کے عہدے سے ہٹا کر فواد چوہدری کو نیا ترجمان مقرر کردیا ہے۔

ایکسپریس نیوز کے مطابق چیرمین تحریک انصاف عمران خان نے پارٹی ترجمان اور سینئر رہنما نعیم الحق کو عہدے سے ہٹا دیا ہے جب کہ ان کی جگہ نعیم بخاری کو پارٹی کی ترجمانی کی پیشکش کی گئی لیکن انہوں نے معذرت کرلی جس کے بعد فواد چوہدری کو پارٹی کا ترجمان مقرر کردیا گیا ہے۔

پی ٹی آئی کے جنرل سیکریٹری جہانگیر ترین نے فواد چوہدری کو پارٹی ترجمان بنانے کی تصدیق کرتے ہوئے کہا کہ فواد چودھری کی نامزدگی میں عمران خان اور نعیم الحق کی رضا مندی شامل ہے اور نعیم الحق، فواد چودھری ایک ساتھ پارٹی کا محکمہ اطلاعات چلائیں گے تاہم سیکریٹری انفارمیشن نعیم الحق اپنی عہدے پر برقرار رہیں گے۔

Naeem ul Haq remains PTI's Central Info Secretary & main spokesperson. In addition we have a team of PTI spokespersons to represent us on TV

— Imran Khan (@ImranKhanPTI) November 23, 2016

دوسری جانب چیرمین پی ٹی آئی نے سوشل میڈیا کی ویب سائٹ پر ٹوئٹ کرتے ہوئے کہا کہ نعیم الحق پارٹی کے سینٹرل انفارمیشن سیکریٹری رہیں گے لیکن ہم نے پارٹی میں ایک اور ترجمان کا اضافہ کیا ہے جو ٹی وی پر تحریک انصاف کی نمائندگی کریں گے۔

واضح رہے نعیم الحق نے گزشتہ روز پاناما لیکس پر قطری شہزادے کے خط کو بے نظیربھٹو کے وصیت کے ساتھ جوڑا تھا جس پر پی ٹی آئی کو شدید تنقید کا نشانہ بنایا گیا تھا تاہم نعیم الحق نے اپنی ہی خبر کر تردید کردی تھی۔