کالے دھن سے ڈالرخرید کربیرون ملک منتقلی کے خلاف تحقیقات شروع

متعددمنی چینجرزکونوٹس جاری،بڑے پیمانے پرڈالرخریدنے والوں کی تفصیلات طلب

Irshad Ansari December 03, 2016

ایئرپورٹس پرنگران ٹیمیں تعینات،تفصیلات جمع،گھروں پرچھاپے مارے جائینگے،ذرائع فوٹو: فائل

KARACHI: ایف بی آرنے مارکیٹ سے بڑے پیمانے پر کالے دھن سے ڈالر خریدنے والوں کیخلاف تحقیقات شروع کردیں اور اس ضمن میں اسلام آباد کے متعدد منی چینجرز کو نوٹس جاری کردیے ہیں۔

ایف بی آرکے ذرائع کے مطابق ان ڈکلیئرڈ اورمشکوک ٹرانزیکشن کرنیوالے افراد کا ڈیٹا اکٹھا کیا جا رہا ہے اور غیر ملکی زرمبادلہ کی بیرون ملک منتقلی روکنے کیلیے تمام ایئرپورٹس پر ایف بی آر کی نگران ٹیمیں تعینات کر دی گئی ہیں۔ ایف بی آر کے سینئر افسر نے ذرائع کو بتایا کہ ان تحقیقات کا مقصد ان لوگوں کی تفصیلات جمع کرناہے جو مارکیٹ سے ڈالر خرید کر بیرون ملک لے جارہے ہیں۔

منی چینجرز سے گزشتہ دو مہینے کے دوران بڑے پیمانے پر ڈالر خریدنے والوں کی تفصیلات مانگی گئی ہیں جبکہ ان افراد کا ریکارڈ بھی مانگا ہے جنھوں نے 2500سے زیادہ ڈالر بیرون ملک بھیجے ہیں۔

ذرائع نے بتایا کہ ایف بی آر کو معلوم ہوا ہے کہ کالا دھن رکھنے والے افرادبڑے پیمانے پر ڈالر اور دیگر غیر ملکی کرنسی مارکیٹ سے اٹھا رہے ہیں جس کی وجہ سے ڈالر کی قیمت میں کمی واقع ہوئی ہے۔ ذرائع نے بتایا اسلام آباد اور گرد نواح کے ایک درجن سے زائد لوگوں کے بارے میں تفصیلات جمع کرلی گئی ہیں جن کے گھروں پر چھاپے مارے جائیںگے۔ ڈالر کی مشکوک ٹرانزیکشن کرنیوالوں کیخلاف انکم ٹیکس آرڈیننس مجریہ 2001 کے تحت کارروائی کی جارہی ہے۔