پاک بھارت کرکٹ سیریز میں حصہ لینے کیلئے پاکستانی ٹیم بھارت پہنچ گئی

پاکستان اوربھارت کے درمیان کھیلی جانے والی کرکٹ سیریز میں حصہ لینے کے لئے پاکستانی ٹیم بھارت پہنچ گئی۔

پاکستان کی ٹی ٹوئنٹی ٹیم کا 26 رکنی دستہ محمد حفیظ کی قیادت میں لاہور کے علامہ اقبال انٹرنیشنل ائر پورٹ سے بھارت کے لئے روانہ ہوا،دستے میں15کھلاڑی اور مینجر نوید اکرم چیمہ سمیت 11 آفیشلز شامل ہیں۔

اس موقع پر میڈیا کے نمائندوں سے بات کرتے ہوئے بولنگ کوچ محمد اکرم نے کہا کہ پاک بھارت سیریز نہایت اہمیت کی حامل ہے۔ انہوں نے کہا کہ پاکستان کے پاس ایک نہیں بلکہ ہر شعبے میں کوالٹی پلیئرز موجود ہیں۔

پاکستانی ٹیم، بھارت کے خلاف پہلا ٹی ٹونٹی منگل کو بنگلور کے چِنا سوامی اسٹیڈیم میں شام ساڑھے چھ بجے کھیلے گی۔ جبکہ دوسرا ٹی ٹونٹی 28 دسمبر کو سردار پٹیل اسٹیڈیم احمد آباد میں شام ساڑھے چار بجے کھیلا جائے گا۔

3 ایک روزہ میچوں کے لئے مصباح الحق کی قیادت میں دیگر کھلاڑی 26 دسمبر کوبھارت روانہ ہوں گے۔