دورہ آسٹریلیا میں قومی ٹیم کو پہلا دھچکا لیگ اسپنر یاسر شاہ ان فٹ

قومی ٹیم کے لیگ اسپنر یاسر شاہ ان فٹ ہوگئے ہیں جس کے سبب وہ آسٹریلیا اے کے خلاف وارم اپ میچ نہیں کھیل سکیں گے۔

قومی ٹیم آسٹریلیا میں موجود ہے جہاں وہ کینگروز کے خلاف 3 ٹیسٹ میچوں کی سیریز کھیلے گی لیکن اس سے قبل گرین کیپس 15 دسمبر کو شروع ہونے والے پہلے ٹیسٹ میچ سے قبل 8 دسمبر کو ایک وارم اپ میچ کھیلے گی تاہم قومی ٹیم کو حالیہ دنوں میں بیشتر ٹیسٹ میچز میں کامیابی سے ہمکنار کروانے والے لیگ اسپنر یاسر شاہ پریکٹس سیشن کے دوران ان فٹ ہوگئے ہیں۔


یاسر شاہ پریکٹس کے دوران کمر کی تکلیف میں مبتلا ہوگئے ہیں، ڈاکٹرز نے انہیں 2 دن آرام کی ہدایت کی ہے، جس کے سبب وہ وارم اپ میچ میں شرکت نہیں کرسکیں گے تاہم پہلے ٹیسٹ میں ان کی شرکت متوقع ہوسکے گی۔

واضح رہے گرین کیپس نے کینگروز کے دیس میں آج تک کوئی سیریز نہیں جیتی،32 ٹیسٹ میں سے صرف 4میں سرخرو ہوئے، گذشتہ تینوں ٹورز میں کلین سویپ کی خفت اٹھانا پڑی جب کہ قومی ٹیم نے آخری میچ 1995میں جیتا تھا۔