کراچی کے مختلف علاقوں میں فائرنگ سے ایک شخص جاں بحق 3 زخمی

گلشن معمار میں فائرنگ سے زخمی ہونے والا شخص حساس ادارے کا اہلکار ہے، پولیس، فوٹو؛ فائل

---

ISLAMABAD: شہر قائد کے مختلف علاقوں میں فائرنگ سے ایک شخص جاں بحق اور حساس ادارے کے اہلکار سمیت 3 افراد زخمی ہوگئے۔

شہر قائد میں ٹارگٹ کلر ایک بار پھر سرگرم ہوگئے اور مختلف علاقوں میں فائرنگ کے پے در پے واقعات میں ایک شخص جاں بحق جب کہ حساس ادارے کے اہلکار سمیت 3 افراد زخمی ہوگئے۔ ایکسپریس نیوز کے مطابق لانڈھی کے علاقے مرتضیٰ چورنگی کے قریب نامعلوم مسلح ملزمان کی فائرنگ سے ایک شخص جاں بحق ہوگیا جب کہ گلشن معمار میں نامعلوم افراد کی فائرنگ سے ایک شخص زخمی ہوا جسے فوری طبی امداد کے لیے اسپتال منتقل کردیا گیا۔

پولیس کا کہنا ہے کہ زخمی ہونے والا شخص حساس ادارے کا اہلکار ہے۔ پاک کالونی میں بھی نامعلوم ملزمان کی فائرنگ سے 2ا فراد زخمی ہوگئے جنہیں طبی امداد کے لیے اسپتال منتقل کردیا گیا۔ پولیس نے جاں بحق ہونے والے شخص کی لاش ضابطے کی کارروائی کے لیے تحویل میں لے لی ہے جب کہ فائرنگ کے واقعات کی تفتیش کا آغاز کردیا گیا ہے۔