بغیردماغ شیر نے پنجے مار کر پنجاب کنگال کردیا پرویز الٰہی

آئندہ الیکشن میں ہمارا انتخابی نشان سائیکل ہی ہو گا، گجرات میں تقریب سے خطاب، گفتگو۔ فوٹو : فائل

---

پاکستان مسلم لیگ (ق) کے سینئر رہنما و نائب وزیر اعظم چوہدری پرویزالٰہی نے کہا ہے کہ سائیکل اپنے سوار کو منزل تک پہنچاتی ہے جبکہ شیر کا دماغ نہیں ہوتا اور اس نے پنجے مار مار کر ہمارے دور کے خوشحال پنجاب کو کنگال کر دیا۔

وہ گجرات میں ایک فاسٹ فوڈ ریسٹورانٹ کی افتتاحی تقریب سے خطاب اور میڈیا سے گفتگو کر رہے تھے۔ انھوں نے کہا کہ آئندہ جنرل الیکشن میں ہمارا انتخابی نشان سائیکل ہی ہو گا، پنجہ مارنا شیر کی خصلت ہے ، پہلا پنجہ مار کر ہی اس نے پنجاب میں ہمارے منصوبوں کو بند کر دیا، پھر پنجے مار مار کر دانش اسکول، سستی روٹی اسکیم، پیلی ٹیکسی، مکینیکل تنور، آشیانہ اور لوٹ مار کی ایسی ہی دیگر اسکیموں کے ذریعے کھربوں روپے ضائع کر کے صوبہ کو بدحال کر دیا۔ پرویزالٰہی نے کہا کہ ن لیگ پنجاب میں ضمنی الیکشن میں دھاندلی سے خوش نہ ہو جنرل الیکشن میں حقیقت واضح ہو جائے گی اور عوام ہمارے حق میں فیصلہ دیں گے ۔



انھوں نیکہاکہ پنجاب میں کارڈیالوجی اسپتال بنائے مگر ن لیگ کے انتقامی رویے کی وجہ سے وزیرآباد کارڈیالوجی اسپتال ابھی تک شروع نہیں کیا گیا۔ اسی طرح انھوں نے گجرات یونیورسٹی بنائی جو اسٹیٹ آف آرٹ ہے۔ اس موقع پر چوہدری غلام رسول، محمد رفیق رنگون والا، چوہدری نوید اکبر نے بھی خطاب کیا جبکہ ایم پی اے عبد اللہ یوسف، خالد اصغر گھرال، میاں عمران مسعود، میاں ہارون مسعود، چوہدری پرویز پگانوالہ اور نجیب اشرف چیمہ بھی موجود تھے۔