کراچی میں قبرستان سے مردے نکال کر قبریں بیچنے والا ملزم گرفتار پولیس

ملزم قبر 15 سے 20 ہزار میں فروخت کرتا تھا، پولیس، اسکرین گریب/ ایکسپریس نیوز

---

پولیس نے قبرستان سے مردے نکال کر قبریں بیچنے والے گورکن کو گرفتار کرلیا۔

پولیس کے مطابق عزیز آباد انویسٹی گیشن ٹیم نے کراچی کے علاقے یاسین آباد کے قبرستان میں کارروائی کی جس کے نتیجے میں یاسین آباد قبرستان سے قبریں کھودنے کے بعد مردے نکال کر قبریں بیچنے والے ملزم فیاض کو گرفتار کرلیا گیا، ملزم قبرستان میں گورکن تھا جو نئی قبروں کو کچھ عرصے بعد کھودنے کے بعد مردہ نکال دیا کرتا تھا اور قبر 15 سے 20 ہزار میں فروخت کرتا تھا۔

پولیس کے مطابق ایک شہری نے ملزم کے خلاف ایف آئی آر درج کروائی جس پر پولیس نے ملزم کو تلاش کرنے کے لیے چھاپے مارے لیکن ملزم فیاض کچھ عرصے تک مفرور رہا لیکن آج ملزم کی موجودگی کی اطلاع ملی جس پر پولیس چھاپا مار کر گورکن کو گرفتار کرلیا۔

دوسری جانب ملزم فیاض کا کہنا ہے کہ میں کسی کو بھی قبر نہیں دیتا تھا یہ کام انتظامیہ کا ہے لہٰذا ان سے پوچھ گچھ کی جائے جب کہ میں 2 سال سے کام چھوڑ چکا ہوں، اس بات کی پوری انکوائری کی جائے۔