طیارہ حادثہ جنید جمشید کی اہلیہ اور کیپٹن صالح کی میتیں لواحقین کے حوالے

نیہا جنید کی میت ان کی والدہ جب کہ کیپٹن صالح کی میت ان کی بہن نے وصول کی. فوٹو: فائل

---

FAISALABAD: پی آئی اے طیارہ حادثے میں جاں بحق ہونے والے مزید دو افراد کی شناخت ہو گئی ہے جس کے بعد میتیں ان کے ورثا کے حوالے کر دی گئی ہیں۔

ایکسپریس نیوز کے مطابق جنید جمشید کی اہلیہ نیہا جمشید اور حادثے کا شکار ہونے والے طیارے کے کیپٹن صالح جنجوعہ کی میتوں کی شناخت ان کے دانتوں کے ذریعے کی گئی جس کے بعد دونوں افراد کی میتوں کو ان کے لواحقین کے حوالے کر دیا گیا۔

اس خبر کو بھی پڑھیں: جنید جمشید کی تدفین دارالعلوم کراچی میں ہوگی

جنید جمشید کی اہلیہ نیہا کی میت ان کی والدہ نے وصول کی جب کہ کیپٹن صالح کا جسد خاکی ان کی بہن کے حوالے کیا گیا۔ کیپٹن صالح جنجوعہ کی نماز جنازہ ریس کورس پارک راولپنڈی میں ادا کی گئی جس میں مسلم لیگ (ن) کے سینئر رہنما راجہ ظفرالحق اور پی آئی اے کے عملے سمیت بڑی تعداد میں اہل علاقہ نے شرکت کی جب کہ نیہا جنید کی نماز جنازہ کل لاہور میں ادا کی جائے گی۔

اس خبر کو بھی پڑھیں: طیارہ حادثے میں جنید جمشید سمیت 47 افراد جاں بحق

دوسری جانب وفاقی وزیر طارق فضل چوہدری کا کہنا ہے کہ طیارے کے حادثے میں جاں بحق ہونے والے 10 افراد کی شناخت ہو چکی ہے، دو کی شناخت ان کے دانتوں کے ذریعے جب کہ 8 میتوں کی شناخت ان کے چہروں کے ذریعے ہوئی۔