بگ بیش‘ سڈنی کی دونوں ٹیمیں ناکام ہوبارٹ ہوریکنزکے لیے پونٹنگ کی ففٹی

سڈنی سکسرز کیخلاف کامیابی پر ایڈیلیڈ اسٹرائیکرز کے ٹم لوڈمین کی ساتھی اوپنر کلنگرکو مبارکباددے رہے ہیں ۔ فوٹو: فائل

---

بگ بیش میں ایڈیلیڈ اسٹرائیکر نے سڈنی سکسرز کو 9 وکٹوں سے شکست دے دی۔

فاتح سائیڈ نے 136 رنز کا ہدف صرف ایک وکٹ گنوا کر 15.5 اوورز میں ہی حاصل کرلیا، ٹم لوڈمین نے 43 گیندوں پر ناقابل شکست 71 رنز اسکور کیے، مائیکل کلنگر نے 53 رنز بنائے۔ اس سے قبل سڈنی سکسرز کی ٹیم 6 وکٹوں پر 135 رنز بنا پائی، اسٹیون اسمتھ 58 اور موسیس ہینرکس 32 رنز کے ساتھ نمایاں رہے، شان ٹیٹ نے دو وکٹیں لیں۔

اس سے قبل کھیلے گئے پہلے مقابلے میں ہوبارٹ ہوریکینز نے سڈنی تھنڈرکو 30 رنز سے ٹھکانے لگایا، جوابی اننگز میں تھنڈر 9 وکٹ پر 147 رنز بنا پائے، سائمن کین اور کرس روجرز نے 24، 24 جبکہ اظہر محمود نے 23 رنز اسکور کیے۔ زیویئر ڈہورٹی نے 3 اور بین لولین نے 2 وکٹیںلیں۔ اس سے پہلے ہوبارٹ نے 4 وکٹوں پر 177 رنز اسکور کیے، سابق آسٹریلوی کپتان رکی پونٹنگ 63 رنز کے ساتھ ٹاپ اسکورر رہے، ٹم پین نے 40 رنز اسکور کیے، ایڈم زامپا نے تین کھلاڑیوں کو آئوٹ کیا۔