ممبئی حملہپاکستانی کمیشن کو بھارتی گواہوں پر جرح کی اجازت

وزیر داخلہ کے حالیہ دورہ بھارت کے دوران تحقیقات تیزی سے آگے بڑھانے پر اتفاق ہوا تھا. فوٹو: رائٹرز

---

ممبئی حملہ کیس میں پاکستان کے عدالتی کمیشن کو بھارتی گواہوں پر جرح کی اجازت مل گئی ہے۔

پاکستان اور بھارت کے درمیان تفتیش سے متعلق اتفاق رائے ہو گیا ہے۔ ایک نجی ٹی وی کے مطابق وزارت داخلہ کے ذرائع نے بتایا کہ بھارتی وزارت داخلہ کے جوائنٹ سیکریٹری دھرمیندر شرما کی قیادت میں 4 رکنی وفد نے پاکستانی حکام سے مذاکرات کیے۔



مذاکرات کے نتیجے میں حتمی طور پر پاکستان کے عدالتی کمیشن کو بھارتی گواہوں پر جرح کی اجازت مل گئی۔ پاکستان کے عدالتی کمیشن کے دورہ بھارت کی تاریخوں کا اعلان جلد کیا جائے گا، جس کے دوران وہ ممبئی حملہ کیس کے 4 گواہوں پر جرح کر سکیں گے۔ بھارتی وفد نے دورہ پاکستان کے دوران اٹارنی جنرل پاکستان اور ایف آئی اے حکام سے ملاقاتیں کیں۔ وزیر داخلہ کے حالیہ دورہ بھارت کے دوران دونوں ملکوں نے ممبئی حملہ کیس کی تحقیقات تیزی سے آگے بڑھانے پر اتفاق کیا تھا۔