نواب شاہ ڈکیتی میں مزاحمت پر پولیس اہلکار جاں بحق مکان مالک زخمی

ایس ایس پی خالد مصطفی نے کہا کہ ملزمان کو ہر قیمت پر گرفتار کر کے قرار واقعی سزا دی جائے گی۔ فوٹو: فائل

---

نواب شاہ کے علاقے غلام رسول شاہ کالونی میں3 نامعلوم مسلح ملزمان آصف قریشی نامی شخص کے مکان میں داخل ہوئے اور اسلحہ کے زور پر اہل خانہ کو یرغمال بنا کر 20 تولے کے طلائی زیورات، 50 ہزار نقدی، موبائل فون اور دیگر قیمتی اشیا لوٹ لیں اور مزاحمت پر فائرنگ کر کے مکان مالک کو زخمی کر دیا۔

ڈاکووں نے فرار ہونے کی کوشش کی تو گھر کے باہر گلی میں موجود پولیس اہلکار تنظیم خان پٹھان نے ڈاکوئوں کو پکڑنے کی کوشش کی، جس پر ڈاکوئوں نے فائرنگ کر دی، جس کے نتیجے میں پولیس اہلکار موقع پر ہی جاں بحق ہو گیا، جبکہ ملزمان فرار ہو گئے۔ مقتول پولیس اہلکار کی لاش اور زخمی کو پی ایم سی اسپتال لایا گیا، جہاں پوسٹ مارٹم کے بعد لاش ورثا کے حوالے کر دی گئی۔

واقعہ کی اطلاع ملنے پر ایس ایس پی خالد مصطفی کورائی و دیگر پولیس افسران پی ایم سی اسپتال پہنچ گئے، جب کہ علاقے کی ناکا بندی کر ا دی گئی ہے۔ ایس ایس پی خالد مصطفی نے کہا کہ ملزمان کو ہر قیمت پر گرفتار کر کے قرار واقعی سزا دی جائے گی۔