حماد صدیقی کے کہنے پربلدیہ فیکٹری میں آگ لگائی رحمان بھولا کا اعترافی بیان

فیکٹری میں آگ لگانے کے لیے کیمیکل کے پیکٹ حماد صدیقی کے کہنے پر زبیر چریا کو دیئے، رحمان بھولا، فوٹو؛ ایکسپریس/ فائل

---

لاہور: بلدیہ فیکٹری کیس کے مبینہ مرکزی ملزم رحمان عرف بھولا نے فیکٹری میں آگ لگانے کا اعترافی بیان قلمبند کرادیا۔

ایکسپریس نیوز کےمطابق بلدیہ فیکٹری کیس کے مبینہ مرکزی ملزم رحمان عرف بھولا کو پولیس اور رینجرز کی سخت سیکیورٹی میں سٹی کورٹ لایا گیا جہاں ملزم کا ضابطہ فوجداری کے تحت اعتراف بیان ریکارڈ کیا گیا، ملزم نے جوڈیشل مجسٹریٹ غربی کے سامنے اعترافی بیان میں کہا کہ بھتہ نہ دینے پر حماد صدیقی کے کہنے پر فیکٹری میں آگ لگائی۔

اس خبر کو بھی پڑھیں: ایف آئی اے ٹیم رحمان بھولا کو بنکاک سے کراچی لے آئی

ملزم نے بتایا کہ اس نے فیکٹری میں آگ لگانے کے لیے کیمیکل کے پیکٹ حماد صدیقی کے کہنے پر زبیر چریا کو دیئے جس نے اپنے ساتھیوں کے ساتھ مل کر فیکٹری میں آگ لگائی، ملزم کو بیان ریکارڈ کرانے کے بعد واپس پولیس کی تحویل میں دے دیا گیا۔

اس خبر کو بھی پڑھیں: رحمان بھولا کا جے آئی ٹی کے سامنے 25 قتل کا اعتراف

واضح رہے کہ ملزم رحمان عرف بھولا پر بلدیہ فیکٹری میں آگ لگانے کا الزام ہے جس میں 258 افراد جھلس کر جاں بحق ہوگئے تھے جب کہ ملزم کو گزشتہ دنوں انٹر پول نے بینکاک میں گرفتار کیا جہاں سے ایف آئی اے کی ٹیم اسے پاکستان لائی۔