آصف زرداری خصوصی طیارے کے ذریعے دبئی سے کراچی پہنچ گئے

 پیپلز پارٹی کے جیالوں کی بڑی تعداد نے سابق صدر کا استقبال کیا۔ فوٹو: این این آئی

---

پاکستان پیپلزپارٹی کے شریک چیرمین آصف علی زرداری ڈیڑھ سال بعد دبئی سے وطن واپس پہنچ گئے ہیں۔

سابق صدرآصف علی زرداری ڈیڑھ سال بعد وطن واپس پہنچ گئے، آصف علی زرداری کے خصوصی طیارے نے کراچی کے اولڈ ٹرمینل پر لینڈ کیا جہاں ان کے استقبال کے لئے جیالوں کی بڑی تعداد موجودتھی۔ کارکنوں کی جانب سے بھنگڑے ڈالے گئےاور پارٹی ترانوں پر رقص کیا گیا۔

پیپلزپارٹی کی جانب سے مختلف علاقوں میں استقبالیہ کیمپس بھی لگائے گئے جب کہ آصف علی زرداری کی وطن واپسی کے موقع پر اونٹوں اور بکروں کا صدقہ بھی دیا گیا۔ وزیراعلیٰ سندھ مراد علی شاہ، سابق وزیراعظم یوسف رضا گیلانی اور سابق وزیراعلیٰ قائم علی شاہ سمیت پیپلز پارٹی کے دیگر رہنماؤں نے سابق صدر کا استقبال کیا۔

آصف زرداری 24 دسمبر کو پارٹی کے ارکان اسمبلی سے ملاقات کریں گے اور 26 دسمبر کو لاڑکانہ روانہ ہوں گے جہاں وہ 27 دسمبر کو اپنی اہلیہ اور سابق وزیراعظم بے نظیر بھٹو کی برسی کی تقریب سے خطاب کریں گے۔