آصف زرداری کی آمد پر خودکش حملے کاخدشہ ہے سندھ پولیس

دہشت گرد بارود سے بھری گاڑی، اندھا دھند فائرنگ، ریموٹ کنٹرول بم دھماکا کر سکتے ہیں، مراسلہ

Staff Reporter December 23, 2016

صورتحال کومدنظر رکھتے ہوئے انتہائی فول پروف سیکیورٹی انتظامات کویقینی بنایا جائے، خط۔ فوٹو؛ فائل

پیپلز پارٹی کے شریک چیئرمین اور سابق صدر آصف زرداری کی کراچی آمد کے موقع پر سندھ پولیس نے کراچی سمیت سندھ کے اعلیٰ پولیس افسران کوایک خط جاری کیا گیا ہے جس میں بتایا گیا ہے کہ آصف زرداری کی آمدکے موقع پرخودکش حملے سمیت دہشت گردی کاخدشہ ہے۔

ذرائع کے مطابق اے آئی جی پی آپریشنزسندھ نعیم شیخ کی جانب سے ایڈیشنل آئی جی سندھ اسپیشل برانچ، ایڈیشنل آئی جی ٹریفک سندھ، ایڈیشنل آئی جی کراچی پولیس، ڈی آئی جیز حیدرآباد، شہیدبے نظیرآباد، سکھر، میرپورخاص اورلاڑکانہ رینج جبکہ ایس ایس پیزڈسٹرکٹ حیدرآباد اور جام شورو کوایک خط ارسال کیا گیاہے جس میں بتایا گیا ہے کہ آصف زرداری آج (جمعہ 23 دسمبر کو) کراچی ایئر پورٹ پہنچیں گے اور اس موقع پر پیپلز پارٹی کے رہنما، عہدے داراور بڑی تعداد میں کارکن ریلیوں کی شکل میں خوش آمدید کہنے کے لیے کراچی ایئرپورٹ پہنچیں گے، صورتحال کومدنظر رکھتے ہوئے انتہائی فول پروف سیکیورٹی انتظامات کویقینی بنایا جائے۔

خط کے مطابق اس موقع پر دہشت گردوں کی جانب سے خودکش حملہ جس میں مرد، عورت یا نوجوان کو استعمال کیا جا سکتاہے، دہشت گرد بارود سے بھری گاڑی سے بھی خودکش حملہ یا ریمورٹ کنٹرول بم کے ذریعے تباہی پھیلاسکتے ہیں۔