بھارت کی ملکہ حسن الیکشن میں حصہ لیں گی

انتخابات میں حصہ لینے کے اعلان پر انہیں سوشل میڈیا فالوورز کے ملے جلے ردِعمل کا سامنا ہے

ویب ڈیسک December 30, 2016

املیبنلا وٹی نے مارگریٹ تھیچر سے متاثر ہوکر ’معاشی آزادی پر ساری آزادی کا انحصار ہے‘ کا انتخابی نعرہ اختیار کیا ہے۔ (فوٹو: فائل)

بھارتی ریاست ناگالینڈ کی 21 سالہ ملکہ حسن املیبنلا وٹی آئندہ بلدیاتی انتخابات میں آؤنگزا وارڈ موکوکچونگ سے حصہ لیں گی۔

املیبنلا وٹی گزشتہ سال مس ناگالینڈ بنی تھیں جبکہ اس سال وہ مس سپر ٹیلنٹ ورلڈ کے مقابلے میں تیسرے نمبر پر رہیں اور وہ آج کل سیاحت اور انسانی حقوق کی اعزازی سفیر بھی ہیں۔

انہوں نے آؤنگزا وارڈ موکوکچونگ کی میونسپل کونسل نمبر 21 سے بلدیاتی انتخابات میں جنرل کٹیگری سے حصہ لینے کا اعلان کیا ہے جس پر انہیں سوشل میڈیا پر ملے جلے ردِعمل کا سامنا ہے۔

کچھ لوگوں کا کہنا ہے کہ سیاست میں آکر وہ بھی بدعنوان سیاست دانوں کا حصہ بن جائیں گی جبکہ زیادہ تر لوگوں نے اس فیصلے کی تعریف کرتے ہوئے کہا ہے کہ الگ سوچ رکھنے والے نئے لوگوں کو سیاست میں آنا چاہئے تاکہ سیاسی حالات میں بہتری آئے۔

اگرچہ املیبنلا وٹی کو عملی سیاست کا کوئی تجربہ نہیں لیکن وہ قانون کی ڈگری رکھتی ہیں اور ماضی میں کئی فلاحی اداروں کےلئے خدمات بھی انجام دیتی رہی ہیں۔ وہ آئندہ بلدیاتی انتخابات میں حصہ لینے والی سب سے کم عمر امیدوار بھی ہیں جنہوں نے مارگریٹ تھیچر سے متاثر ہوکر ''معاشی آزادی پر ساری آزادی کا انحصار ہے'' کا انتخابی نعرہ اختیار کیا ہے۔