لاہورکے جناح اسپتال میں مریضہ کی ہلاکت تحقیقات کا آغاز

3 رکنی تحقیقاتی ٹیم نے اسپتال کے ایم اسی، 5 ڈاکٹروں اور 4 نرسوں سے پوچھ گچھ کی جائے گی

ویب ڈیسک January 03, 2017

زمہ داروں سے سختی سے نمٹاجائے گا، تحقیقاتی ٹیم۔ فوٹو : ایکسپریس نیوز

لاہور: لاہورکے جناح اسپتال میں مریضہ کی ہلاکت کے بعد وزیراعلیٰ کے حکم پر تحقیقات کا آغاز کردیا گیا ہے۔

ایکسپریس نیوز کے مطابق وزیراعلیٰ پنجاب کے حکم پر گزشتہ روز لاہور کے جناح اسپتال میں علاج نہ ہونے کے باعث ہلاک ہونے والی مریضہ زہرہ بی بی کی ہلاکت کی تحقیقات شروع کردی گئی ہیں اور اسی سلسلے میں آج تین رکنی تحقیقاتی ٹیم اسپتال پہنچی ہے جہاں اسپتال کے ایم ایس اور 5 ڈاکٹروں سمیت 4 نرسوں سے پوچھ گچھ کی جائے گی۔

اس خبر کو بھی پڑھیں : جناح اسپتال لاہور میں مریضہ ٹھنڈے فرش پرتڑپ تڑپ کر جان کی بازی ہار گئی

تحقیقاتی کمیٹی کنگ ایڈورڈ میڈیکل یونیورسٹی کے وائس چانسلر ڈاکٹر فیصل مسعود کی سربراہی میں بنائی گئی ہے اور کمیٹی میں فاطمہ جناح میڈیکل کالج کے پرنسپل ڈاکٹر فخر امام اور ایڈیشنل سیکرٹری ہیلتھ ڈاکٹر سلمان بھی شامل ہیں، سینئر رجسٹرار، میڈیکل آفیسر اور سینئرہیڈ نرسز کی تحقیقات اسپتال کے پروفیسر کریں گے جب کہ ایمرجنسی اور ایڈمنسٹریشن کی تحقیقات ڈاکٹر یحیٰ اور ڈاکٹر جعفر شاہ کریں گے۔ ذرائع کے مطابق تحقیقاتی کمیٹی کسی کا لحاظ نہیں کرے گی جب کہ تحقیقاتی ٹیم کاکہنا ہے کہ ذمہ داروں سے سختی سے نمٹاجائے گا اور واقعہ کی تفصیلی تحقیقاتی رپورٹ وزیراعلیٰ پنجاب کو پیش کی جائے گی۔

واضح رہے کہ گزشتہ روز لاہور کے جناح اسپتال میں خاتون مریضہ زہرہ بی بی کو اسپتال کی ایمرجنسی میں بیڈ نہ ملنے کی وجہ سے ٹھنڈے فرش پر ہی لٹاکر ڈرپ لگادی گئی اور کچھ دیر بعد انہیں شدید بخار نے آگھیرا جس کے باعث خاتون ہلاک ہوگئیں۔