ناموربھارتی اداکاراوم پوری چل بسے

اوم پوری دل کا دورہ پڑنے کی وجہ سے 66 برس کی عمر میں چل بسے، بھارتی میڈیا۔ فوٹو: فائل

---

بھارت کے معروف اداکار اوم پوری 66 برس کی عمر میں چل بسے۔

بھارتی میڈیا کے مطابق معروف اداکار اوم پوری 66 برس کی عمر میں چل بسے۔ اوم پوری کی موت کی وجہ دل کا دورہ بتائی جا رہی ہے۔ اوم پوری کے قریبی دوست نے سوشل میڈیا پر بالی ووڈ کے ورسٹائل اداکار کی موت کی خبر دیتے ہوئے کہا کہ اوم پوری کو دل کا دورہ پڑنے کے باعث اسپتال منتقل کیا گیا تاہم وہ جانبر نہ ہو سکے۔

بھارتی اور پاکستانی فلموں کے علاوہ اوم پوری نے ہالی ووڈ اور برطانوی فلموں میں بھی کام کیا۔ اوم پوری نے اپنی شاندار اور منفرد اداکاری کے باعث بھارت کا چوتھا بڑا سویلین ایوارڈ پدما شری اپنے نام کیا جب کہ انہیں او بی ای ایوارڈ سے بھی نوازا گیا۔ اوم پوری کی موت کی خبر سننے کے بعد بالی ووڈ انڈسٹری کے فنکاربھی صدمے میں ہیں جنہوں نے اپنے دکھ کا اظہارکچھ اس طرح کیا ہے۔

بالی ووڈ کے مایہ نازہدایتکارمہیش بھٹ نے کہا کہ الوداع اوم پوری، تمہارے ساتھ آج میرا بھی ایک حصہ چلا گیا، میں کیسے ان راتوں کو بھول جاوں جب ہم دونوں سینما اورزندگی کے حوالے سے باتیں کیا کرتے تھے۔

Goodbye Om! A part of me goes with you today. How can I ever forget those passionate nights we spent together talking about cinema & life ?

— Mahesh Bhatt (@MaheshNBhatt) January 6, 2017

دوسری جانب اداکارہ پریٹی زنٹا نے بھی ٹوئٹرپرافسوس کا اظہارکرتے ہوئے کہا کہ ایک نہایت باصلاحیت اداکاراوم پوری کی موت کی خبرسن کربہت دکھ ہوا،خدا ان کی روح کو سکون دے اورگھروالوں کو ہمت دے۔

Sad to hear about the passing of the massively talented Om Puri. May god give peace to his soul & strength to his family #RIPOmPuri 🙏

— Preity G Zinta (@realpreityzinta) January 6, 2017

اداکارانوپم کھیرنے کہا کہ اوم پوری کو اتنے سکون سے اپنے بسترپرسوتے دیکھا ہے، یقین نہیں آرہا کہ ہمارا اتنا بہترین اداکارگزرگیا ہے۔ ان کا کہنا تھا کہ وہ اوم پوری کو پچھلے 43 برسوں سے جانتے تھے، اوم پوری ان کے لیے ہمیشہ ایک بہترین اداکاراورسخی انسان ہی رہیں گے۔

Seeing him lying on his bed looking so calm can’t believe that one of our greatest actors #OmPuri is no more. Deeply saddened & shocked.

— Anupam Kher (@AnupamPKher) January 6, 2017

واضح رہے کہ اوم پوری متعدد بھارتی فلموں کے علاوہ پاکستانی فلموں میں بھی اداکاری کے جوہر دکھا چکے ہیں۔ وہ پاکستان اور بھارت کے درمیان پرامن تعلقات کے حامی تھے جس کی وجہ سے انہیں ہندو انتہا پسند تنظیموں کی جانب سے شدید تنقید کا بھی سامنا رہا جب کہ وہ کئی بار پاکستان کا دورہ بھی کر چکے تھے۔