گڈانی میں لنگرانداز ایک اور ناکارہ جہاز میں آگ لگنے سے 5 مزدورجاں بحق

جہاز میں کام کرنے والے 100 مزدوروں میں سے 70 کو بحفاظت نکال لیا گیا ہے، ریسکیوذرائع : فوٹو : فائل

---

گڈانی شپ بریکنگ یارڈ میں لنگرانداز جہاز میں کٹائی کے دوران دوبارہ آگ بھڑک اٹھی جس کے نتیجے میں 5 مزدور جاں بحق اور متعدد تاحال لاپتہ ہیں۔

ایکسپریس نیوزکے مطابق گڈانی شپ بریکنگ یارڈ کے پلاٹ نمبر 60 پر لنگرانداز ہونے والے ناکارہ جہاز میں کٹائی کے دوران دوبارہ آگ بھڑک اٹھی ہے۔ جہاز میں آگ لگنے کی خبر ملتے ہی ریسکیو کی ٹیمیں جائے وقوعہ پر پہنچ گئیں اور 70 مزدوروں کو بحفاظت نکال لیا گیا تاہم 4 مزدور اپنی جان سے ہاتھ دھو بیٹھے۔

اس خبرکوبھی پڑھیں: گڈانی میں کھڑے ایک اورجہاز میں آتشزدگی

ریسکیوذرائع کے مطابق لنگر انداز ہونے والے ایل پی جی بردار جہاز میں کام کرنے والے مزدوروں کی تعداد 100 سے زائد ہے جن میں سے 5 مزدور جاں بحق ہوچکے ہیں اور 70 افراد کو نکال لیا گیا ہے اور باقی مزدور تاحال لاپتہ ہیں جنہیں نکالنے کی کوششیں جاری ہیں۔

دوسری جانب شپ بریکر ایسوسی ایشن اور آتشزدگی کا شکار ہونے والے جہاز کے مالک دیوان محمد رضوان فاروقی کو گرفتارکرلیا گیا ہے۔ ڈپٹی کمشنر لسبیلہ کے مطابق دیوان محمد رضوان فاروقی آگ لگنے والے بحری جہاز کے مالک ہیں اور انہیں جہاز میں آگ لگنے کے واقعے کے بعد ہی گرفتار کرلیا گیا۔

واضح رہے کہ گزشتہ 2 ماہ قبل بھی گڈانی شپ بریکنگ یارڈ میں ہی ایک ناکارہ آئل ٹینکر میں آگ لگنے سے 27 مزدور جاں بحق جب کہ 58 زخمی ہوگئے تھے۔