شاہ رخ خان کو سپراسٹار بننا نہیں آتا

بالی ووڈ سپر اسٹار شاہ رخ خان اپنی ہر فلم میں منفرد اداکاری کرتے نظر آتے ہیں لیکن اس کے باوجود کروڑوں دلوں پر راج کرنے والے کنگ خان اپنی کامیابیوں پر کم ہی بولتے دکھائی دیتے ہیں اور اب ان کا کہنا ہے کہ انہیں سپراسٹار بننا ہی نہیں آتا۔

بھارتی میڈیا رپورٹس کے مطابق بالی ووڈ اداکار شاہ رخ کا ایک انٹرویو کے دوران کہنا تھا کہ انہیں بالکل نہیں معلوم کہ ایک سپراسٹار کا کردار کس طرح نبھایا جاتا ہے۔ انہوں نے کہا کہ جب وہ فلم کے سیٹ پر ہوتے ہیں تو تمام تر توجہ بہترین اداکاری پر ہوتی ہے۔


اس خبر کو بھی پڑھیں: شاہ رخ کا فلم ''رئیس'' کی تشہیر کیلیے ٹرین کا سفر

بالی ووڈ اداکار کا کہنا تھا کہ کسی بھی فلم کے سیٹ پر اگر کوئی سپراسٹار بننے کی کوشش کرتا ہے تو وہ ایک بے وقوف اداکارکی طرح ہوتا ہے، میں اداکاری کے وقت کردار پر یقین نہیں رکھتا بلکہ کوشش ہوتی ہے کہ میری اداکاری سے مداح اسے دیکھنے پر مجبور ہو جائیں۔

واضح رہے کہ شاہ رخ خان آج کل اپنی نئی آنے والی فلم "رئیس" کی پروموشن میں مصروف ہیں جو 25 جنوری کو سینیما گھروں کی زینت بنے گی۔