ملک میں پٹرولیم مصنوعات کی قلت نہیں ترجمان پی ایس او

اسلام آباد میں ڈیزل اور پٹرول کی قلت کی وجہ سے پی ایس او کے بعض سٹیشنز کی بندش کی خبروں میں کوئی حقیقت نہیں، ترجمان پی ایس او فوٹو: فائل

---

پاکستان اسٹیٹ آئل کے ترجمان نے ملک میں پٹرولیم مصنوعات کی قلت کے تاثر کو مسترد کرتے ہوئے کہا ہے کہ ملکی ضروریات کیلیے ڈیزل اور پٹرول کا وافر ذخیرہ موجود ہے۔

پی ایس او نے پٹرول کی بڑھتی ہوئی طلب پوری کرنے کے لیے ملک بھر میں اپنے ڈپوؤں اور تنصیبات سے دن رات پٹرولیم مصنوعات کی فراہمی کو یقینی بنانے کا فیصلہ کیا ہے تاکہ سی این جی کی بندش کے دوران ایندھن کی بلاتعطل سپلائی کو یقینی بنایا جا سکے۔



کمپنی کے سیلز آفیسر ڈیلر کے ساتھ مل کر وفاقی دارالحکومت اور راولپنڈی سمیت مختلف علاقوں میں پٹرولیم مصنوعات کی اضافی فراہمی کے لیے اقدامات کر رہے ہیں، اسلام آباد میں ڈیزل اور پٹرول کی قلت کی وجہ سے پی ایس او کے بعض سٹیشنز کی بندش کی خبروں میں کوئی حقیقت نہیں، تمام پٹرول پمپوں سے ڈیزل اور پٹرول کی مسلسل فراہمی جاری ہے۔