ٹرمپ کے ایک ٹوئٹ کے بعد میکسیکن صدر نے دورہ امریکا منسوخ کردیا

میکسیکو سرحد پر کسی بھی قسم کی دیوارتعمیر کرنے کے لئے امریکا کو ادائیگی نہیں کرے گا، میکسیکن صدر

ویب ڈیسک January 27, 2017

میکسیکو سرحد پر کسی بھی قسم کی دیوارتعمیر کرنے کے لئے امریکا کو ادائیگی نہیں کرے گا، میکسیکن صدر۔ فوٹو:فائل

میکسیکو کے صدر اینرک پینانیٹو نے امریکی صدر ڈونلڈ ٹرمپ کی جانب سے ٹوئٹر پیغام کے بعد اپنا دورہ واشنگٹن منسوخ کردیا۔

غیرملکی خبررساں ادارے کے مطابق میکسیکن صدر اینرک پینانیٹو کو طے شدہ شیڈول کے مطابق 31 جنوری کو واشنگٹن کا دورہ کرنا تھا جس میں دونوں ملکوں کے درمیان تجارت اور امیگریشن معاملات پر تبادلہ خیال کرنا تھا تاہم ڈونلڈ ٹرمپ کے ایک ٹوئٹ کے بعد میکسیکن صدر نے دورہ امریکا منسوخ کردیا۔ اس سے قبل قیاس آرائیاں کی جارہی تھیں کہ ڈونلڈ ٹرمپ کی جانب سے میکسیکن سرحد پر دیوار تعمیر کرنے کے حکم نامے پر دستخط کے بعد اینرک پینانیٹو امریکا کا دورہ منسوخ کردیں گے تاہم ڈونلڈ ٹرمپ کے ٹوئٹ کے 4 گھنٹے بعد صدارتی آفس نے دورہ منسوخ کرنے کا اعلان کیا۔

of jobs and companies lost. If Mexico is unwilling to pay for the badly needed wall, then it would be better to cancel the upcoming meeting.
— Donald J. Trump (@realDonaldTrump) January 26, 2017

امریکی صدر ڈونلڈ ٹرمپ نے اپنے ٹوئٹ میں کہا تھا کہ اگر میکسیکو سرحد پر دیوار تعمیر کرنے کے لئے ادائیگی نہیں کرنا چاہتا تویہ بہتر ہوگا کہ آئندہ ہونے والی میٹنگ کو منسوخ کردیا جائے۔

اس سے قبل صدر ڈونلڈ ٹرمپ کی جانب سے سرحد پر دیوار تعمیر کرنے کے حکم نامے پر دستخط کرنے پر ردعمل کا اظہار کرتے ہوئے میکسین صدر نے کہا تھا کہ وہ میکسیکو سرحد پر کسی بھی قسم کی دیوار بنانے پر یقین نہیں رکھتا اور اس حوالے سے امریکا کو کوئی ادائیگی نہیں کی جائے گی۔