فلموں میں ’’آئٹم سانگ ‘‘ کو پڑوسی ملک کی نقل قرار دینا درست نہیں متیرا

پاکستانی فلموں میں آئٹم سانگزریکارڈکرواچکی ہوں، اداکاری کے میدان میں بھی صلاحیتوں کو دکھاناچاہتی ہوں۔ فوٹو: فائل

---

اداکارہ وماڈل متیرا نے کہا ہے کہ پاکستان میں اس وقت جدید طرز کے سینما گھربن چکے ہیں اوریہ سلسلہ بڑی تیزی کے ساتھ آگے بڑھ رہا ہے۔

متیرا کا کہنا تھا کہ ہمارے ہاں بھی اب بین الاقوامی معیار کے مطابق فلمیں بنائی جارہی ہیں۔ ہمارے نوجوان فلم میکرز اچھی اورمعیاری فلمیں توبنا رہے ہیں اور ان کومزید بہتربنانے کے لیے ان میں ''آئٹم سانگ'' کا تڑکا بھی لگا رہے ہیں، جوکہ موجودہ دورمیں شائقین کی اولین پسند بن چکے ہیں لیکن کچھ مخالفین اس کوتفریح نہیں بلکہ پڑوسی ملک کی نقل قراردے رہے ہیں، جوکہ درست نہیں۔

اداکارہ نے کہا کہ اس وقت دنیا بھرمیں آئٹم سانگ کوپسند کیا جا رہا ہے۔ شادی بیاہ کی تقریبات ہوں یا مختلف تقریبات، وہاں پرآئٹم نمبرہی حاضرین کوجھومنے پرمجبورکرتے ہیں۔ جوآئٹم سانگ کی کامیابی اور مقبولیت کا ایک بہترین ثبوت ہے۔ اس وقت اگر دیکھا جائے تو فلموں میں آئٹم سانگ شامل کرنے کا رجحان زورپکڑرہا ہے۔

متیرا کا کہنا تھا کہ فلم کی کہانی میں ایک نئی سمت متعارف کروانے کے لیے اکثرآئٹم نمبرکا سہارا لیا جاتا ہے بلکہ فلم کی پروموشن کے لیے بھی اس بہتراورکوئی ذریعہ دکھائی نہیں دیتا۔ اسی لیے توجس طرح بالی وڈ میں شاہ رخ، سلمان خان اورعامرخان کی فلموں میں آئٹم نمبرشامل کیے جاتے ہیں،اسی طرح اب ہمارے ملک میں بھی آئٹم سانگ بے حدضروری سمجھے جارہے ہیں۔ میں سمجھتی ہوں کہ پوری فلم ایک طرف اورآئٹم سانگ ایک طرف ہوتا ہے۔ اس کوتیارکرنے کے لیے جہاں کثیرسرمایہ خرچ کیا جاتا ہے،وہیں اس کی دھن، میوزک ارینجمنٹ اورگائیکی کے لیے منفرد آواز کا انتخاب کرنا ضروری ہوتا ہے جب کہ یہی نہیں فلم کی کامیابی میں آئٹم سانگ کا کرداربہت نمایاں ہوتا ہے۔ اس کی متعدد مثالیں بالی وڈ میں ملتی ہیں اوردوسری جانب پاکستان میں بھی اب اس کوخاص اہمیت دی جارہی ہے۔

ایک سوال کے جواب میں متیرا نے کہا کہ میں نے پاکستانی فلموں میں آئٹم سانگز ریکارڈ کروائے ہیں اورآئندہ بھی اس طرح کے پروجیکٹس کی آفرز ہیں ، لیکن میں اس کے ساتھ ساتھ اب مختلف کرداروں کے ذریعے اپنی فنکارانہ صلاحیتیں بھرپورانداز سے متعارف کروانے کا عزم رکھتی ہوں اورجلد ہی بڑی اسکرین پرمنفرد کردار میں نظرآؤں گی۔