ایرانی ماڈل مندنا کریمی فلم ’’مان جاؤنا‘‘میں نظرآئیں گی

بھارتی فنکاروں کے بعد پاکستانی پروڈیوسرز نے فلموں اور ڈراموں کے لیے ایرانی اور ترکی کے فنکاروں سے رابطے شروع کر دیے ۔ کئی ہدایتکاروں نے زیر تکمیل فلموں کے لیے ترکی اور ایرانی فنکاروں کو کاسٹ کرکے خفیہ طور پر کام شروع کردیا ہے۔


اب ٹی وی ڈراموں کے ہدایتکار عابس رضا نے بھی پروڈیوسر محمد خالد بھٹی کی فلم'' مان جاؤنا'' سے اپنے فلمی کیریئر کا آغاز کردیا ہے ۔ ذرائع نے انکشاف کیا کہ پاکستانی فنکاروں کیساتھ ساتھ انھوں نے ایرانی ماڈل و اداکارہ مندنا کریمی کو مذکورہ فلم میں کاسٹ کیا ہے اورخفیہ طور پر ان کا کام فلمائے جانے کی بھی اطلاعات ہیں،بتایاگیاہے کہ کریو موشن پکچرز کے تحت بنائی جانیوالی فلم ''مان جاؤنا''کی کہانی عاصمہ نبیل اور احسن رضا نے مشترکہ طور پر لکھی ہے ۔ فلم کے فنکاروں میں عدیل چوہدری ، حاجرہ یامین ، ایاز سموں ، اسماعباس، غناعلی کے علاوہ ٹی وی و فلم کے اداکار آصف رضا میر بھی شامل ہیں ۔ ذرائع نے بتایا کہ ایک درجن سے زائد پاکستانی ٹی وی اور فلم پروڈیوسرز نے بھارتی فنکاروں کو کاسٹ کرنے کی منصوبہ بندی کی ہوئی ہے ۔

دونوں ممالک کے درمیان تعلقات بہتر ہونے پر ان فنکاروں کو پاکستانی فلموں کی شوٹنگ کے لیے مد عو کریں گے جب کہ ایرانی و ترکی کے فنکاروں کو بھی لائن اپ کرنے میں مصروف ہیں ۔ ان میں ان کی ترجیحات میں مسلم فنکار شامل ہیں ۔