محمد زبیر عمر نے گورنر سندھ کے عہدے کا حلف اٹھالیا

محمد زبیر عمر نے سندھ کے 32 ویں گورنر کی حیثیت سے حلف اٹھالیا۔

گورنر ہاؤس کراچی میں محمد زبیر کی حلف برداری کی تقریب منعقد ہوئی جس میں چیف جسٹس سندھ ہائی کورٹ جسٹس سجاد علی شاہ نے محمد زیبر سے حلف لیا۔ اس موقع پر وزیر اعلیٰ سندھ مراد علی شاہ، صوبائی وزرا، مسلم لیگ (ن) کے اہم رہنماؤں سمیت اہم سیاسی شخصیات، اعلیٰ سرکاری حکام اور معززین کے علاوہ ان کے اہل خانہ بھی موجود تھے۔

اس خبر کو بھی پڑھیں: گورنرسندھ جسٹس ریٹائرڈ سعیدالزماں صدیقی انتقال کرگئے


مسلم لیگ (ن) کے رہنما محمد زبیرعمر 23 مارچ 1956 كو ایبٹ آباد میں پیدا ہوئے۔ محمد زبیر نے ابتدائی تعلیم ایبٹ آباد اور راولپنڈی میں حاصل كی۔ زبیر عمر نے 1984 میں کراچی کے معروف تعلیمی ادارے آئی بی اے سے پبلک ایڈمنسٹریشن میں ماسٹرز كی ڈگری حاصل كی، وہ امریكی كمپنی آئی بی ایم سے وابستہ رہے اور پیرس، روم، میلان اور دبئی میں تعینات رہے۔

دوسری جانب حلف لینے کے بعد گورنر سندھ محمد زبیر نے مزار قائد پر حاضری دی ، پھول چڑھائے اور فاتحہ خوانی کی، اس موقع پر وزیر مملکت مریم اورنگزیب سمیت مسلم لیگ (ن) کے رہنما دانیال عزیز، طارق فضل چودھری بھی ان کے ہمراہ تھے۔ مزار قائد پر میڈیا سے بات کرتے ہوئے گورنر سندھ کا کہنا تھا کہ وزیراعظم پاکستان کے اعتماد پر ان کا شکرگزار ہوں، میرے اور میرے خاندان کے لیے یادگار دن ہے جب کہ وزیراعظم اور عوام کی امیدوں پر پورا اترنے کی کوشش کروں گا۔ انہوں نے کہا کہ اپنے عہدے کا پورا حق ادا کرنے اور قائد اعظم کے نقش قدم پر چلتے ہوئے سندھ کی ترقی کے لیے کوشش کروں گا۔

واضح رہے 14 سال تک سندھ کے گورنر رہنے والے ڈاکٹر عشرت العباد خان کے بعد جسٹس (ر) سعید الزماں صدیقی کو سندھ کا 31 واں گورنر مقرر کیا گیا تھا جنہوں نے 11 نومبر 2016 کو اپنے عہدے کا حلف اٹھایا تاہم وہ خرابی صحت کی بنا پر زیادہ عرصے تک گورنر کی ذمہ داریاں نہ نبھاسکے اور 12 جنوری 2017 کو انتقال کرگئے۔