وزیراعظم نے کراچی حیدرآباد موٹروے کے تکمیل شدہ حصے کا افتتاح کردیا

موٹروے پر ویگن کا نیا ریٹ 2 روپے 58 پیسے فی کلو میٹر کے حساب سے ہوگا، ترجمان این ایچ اے۔ فوٹو : پی آئی ڈی

---

وزیراعظم نواز شریف نے کراچی حیدرآباد موٹر وے کے تکمیل شدہ حصے کا افتتاح کردیا۔

ایکسپریس نیوزکے مطابق وزیراعظم نوازشریف نے کراچی حیدرآباد ایم نائن موٹروے سیکشن ون کا افتتاح کردیا ہے۔ افتتاح کے موقع پروزیراعظم کے ہمراہ گورنر سندھ محمد زبیر، وزیراعلیٰ سید مراد علی شاہ، وفاقی و صوبائی وزرا اوردیگراہم سیاسی و سرکاری شخصیات بھی تھیں۔

کراچی کوحیدر آباد سے ملانے والی سپرہائی وے کی جگہ اب موٹر وے بنائی جارہی ہے، 36 ارب روپے کی لاگت سے تیار ہونے والا ایم نائن منصوبہ 136 کلومیٹر طویل ہے، اس موٹر وے میں چارانٹرچینج ،دادا بھائی، انڈسٹریل ویلی، نوری آباد اور تھانا بولا خان شامل ہیں جو تھر پارکر، جھمپیر، کینجھر اور مختلف علاقوں کو کراچی سے ملائیں گے۔ منصوبے کا آغاز ستمبر2015 میں ہوا اوراس کا 50 فیصد سے زیادہ مکمل ہوگیا ہے جب کہ دیگرکام رواں برس کے آخرتک مکمل کرلیا جائے گا۔

اس خبرکو بھی پڑھیں: ملک میں مذہب اورسیاست کے نام پر نوجوانوں کو برباد کرنیوالوں کی کمی نہیں

ترجمان این ایچ اے کے مطابق کراچی حیدرآباد ایم نائن موٹر وے کے تیارشدہ 80 کلو میٹر حصے پر فی کلو میٹر ٹول ادا کرنا ہوگا اورموٹر وے پر ویگن کا نیا ریٹ 2 روپے 58 پیسے فی کلو میٹر ہوگا۔

بعد از وزیر اعظم نواز شریف گورنر سندھ محمد زبیر اور وزیر اعلی سندھ سید مراد علی شاہ کے ہمراہ تعزیت کیلیے جسٹس(ر) سعید الزماں صدیقی کے گھر گئے جہاں انہوں نے مرحوم کے درجات کی بلندی اور لواحقین کے صبر کے لیے دعا کی۔