حدیقہ کیانی لندن میں منشیات اسمگلنگ کی جھوٹی خبروں پر بھڑک اٹھیں

برطانوی ویب سائٹ میٹرو یوکے نے خبر شائع کی کہ حدیقہ لندن کے ہیتھرو ایئرپورٹ پر منشیات اسمگل کرتے ہوئے پکڑی گئیں، فوٹو:فائل

---

نامور گلوکارہ حدیقہ کیانی اپنے متعلق میڈیا پر چلنے والی منشیات اسمگلنگ سے متعلق من گھڑت خبروں پر بھڑک اٹھیں جس میں ان کا کہنا تھا کہ بے بنیاد خبروں نے انہیں شدید مایوس کیا۔

برطانوی ویب سائٹ کی جانب سے حدیقہ کیانی سے متعلق منشیات اسمگل کرنے کی خبر شائع کرنے پر گلوکارہ نے شدید مایوسی کا اظہار کرتے ہوئے اپنی ٹوئٹ میں کہا کہ اس مقام پر پہنچنے کے بعد مجھ سے متعلق اس قسم کی من گھڑت اور بے بنیاد خبریں چلانے کا یقین نہیں کرسکتی۔

گلوکارہ حدیقہ کیانی نے اپنی والدہ اور بیٹے کے ساتھ ٹوئٹ میں ایک تصویر شیئر کی اور کہا کہ آج میں اپنی والدہ اور بچے کے ساتھ لاہور میں موجود ہوں اور میں یقین نہیں کرسکتی کہ لندن سے جاری ہونے والی جعلی خبر اس طرح پھیلائی جارہی ہے۔

Photo taken TODAY in Lahore with my mother and son! Cannot believe how this FAKE London news has been spread 😱 pic.twitter.com/0fgudMePTI

— Hadiqa Kiani (@Hadiqa_Kiani) February 14, 2017

واضح رہے کہ برطانوی ویب سائٹ " میٹرو یوکے" نے خبر شائع کی کہ لندن کے ہیتھرو ایئرپورٹ پر دوران تلاشی حدیقہ کیانی کے سامان سے 80 ہزار پاؤنڈ مالیت کی منشیات برآمد ہوئی جو انہوں نے کافی کے ریپرز میں چھپا رکھی تھی۔